Čeračań pra supracoŭnictva z KDB: Tryźnieńnie varjata. Z «Biełsatam» bolej nie razmaŭlaju

Pałkoŭnik u adstaŭcy Uładzimir Baradač, jaki ciapier žyvie ŭ Hiermanii, abvinavaciŭ mahčymaha kandydata ŭ prezidenty, lidara partyi «Hramada» Siarhieja Čeračnia ŭ supracoŭnictvie z KDB.

Z hučnaj zajavaj jon vystupiŭ u efiry telekanała «Biełsat».

Pavodle Baradača, Čeračań užo piać hadoŭ źjaŭlajecca infarmataram KDB. Maŭlaŭ, trapiŭsia jon na kantrabandzie zapčastak z MTZ i pahadziŭsia na supracoŭnictva, kab nie trapić u turmu. Baradač navat nazvaŭ kankretnaje proźvišča čałavieka, jaki nibyta kuryruje Čeračnia — niejki Travulka.

Sam Siarhiej Čeračań adkazaŭ Baradaču ŭ kamientary dla «Našaj Nivy».

Pavialičyć

«Kali ŭ tvajho apanienta jość usie mahčymaści chłusić, placoŭka dla palotu dumki nieabmiežavanaja, to vielmi składana niešta kazać advarotnaje. Mahčyma, heta niejkaja palityčnaja zamova.

Što tyčycca «supracoŭnictva» z KDB, to šmat ludziej užo ŭ mianie pra heta spytali. Składana asprečvać toje, čaho niama. Baradač uklučaje svaju fantaziju i raskazvaje ŭsio, što zaŭhodna. Zrazumiejcie, kali z majho boku niama nijakich adnosin z KDB, to jak ja mahu heta dakazać? Tut faktyčna maje słovy suprać jahonych słovaŭ.

Adzinaje, što ja nie mahu zrazumieć, jak «Biełsat» biez pravierki infarmacyi pastaviŭ hetaje intervju ŭ efir. Ja ź imi razmaŭlaŭ, mnie pisali niekatoryja žurnalisty telekanała, jakija vybačalisia: «Siarhiej Uładzimiravič, my nie adkazvajem za palityku telekanała. Heta na chajpie, u nas ciapier 400 tysiač prahladaŭ. Uvajdzicie ŭ stanovišča i prabačcie».

Asabista maja pazicyja: ja bolš nijakich kantaktaŭ z «Biełsatam» mieć nie budu, kali nie budzie niejkich publičnych vybačeńniaŭ. Nie pavinny dziaržaŭnyja telekanały tak rabić! A vy ž viedajecie, što «Biełsat» finansujecca polskim uradam i MZS. Ja paprasiŭ sustrečy z polskim pasłom, kab pahavaryć pa hetaj situacyi.

Luboje vydańnie, kali jano nie ličyć siabie žoŭtymi stužkami, pavinna pierapraviarać infarmacyju. Ale vy čuli, što kazaŭ Baradač: «Ja vałodaju infarmacyju, ale vam ničoha nie skažu, viercie mnie na słova. Ja aficer savieckaha vojska». Ja heta rasceńvaju jak peŭny presinh u svoj adras.

Proźvišča «Travulka» ja ŭpieršyniu pačuŭ ad Baradača. Nijakich uzajemaadnosin ź siłavym błokam u mianie niama. U mianie byli pa žyćci peŭnyja sutyčki i prablemy pryvatnaha charaktaru, ale, kali tam havorycca, što mianie ledź nie pasadzili z kantrabandaj, pakažycie choć adzin dakumient, choć adnaho ŭdzielnika tych padziej.

A tut prosta čałaviek z chvoraj psichikaj niešta vydaje ŭ efir, i niekatoryja ludzi pačynajuć hetamu vieryć. Kožny čałaviek, jaki moža analizavać, moža zrabić vysnovu, što heta tryźnieńnie varjata. Inšych słovaŭ u mianie niama».

• 0
• 0
• 0
• 0
• 0
• 0
• 0
• 0