Navukoŭcy pračytali dumki małpaŭ z dapamohaj ultrahuku
Kali taki padychod udaskanalić, to jon moža zabiaśpiečyć paralizavanym ludziam novy srodak dla kiravańnia pratezami biez chirurhičnaha ŭmiašańnia ŭ mozh.
Navukoŭcy ŭžo majuć pryładu, jakaja moža čytać dumki: jana składajecca z tysiačy maleńkich pravadoŭ, što impłantujucca ŭ mozh. Adnak ciapier daśledčyki znajšli mienš invaziŭny varyjant — ultrahukavuju vizualizacyju.
Novy mietad ultrahukavoj vizualizacyi vykarystoŭvaje šyroki patok huku, jaki achoplivaje vialikuju častku mozhu. Hety patok vyjaŭlaje źmieny ŭ kryvatoku, što dapamahaje vyznačyć aktyŭnaść niejronaŭ.
Taki sposab nielha nazvać całkam nieinvaziŭnym, bo, kab ustalavać pryładu, nieabchodna vydalić nievialiki frahmient čerapa. Adnak achoŭnaja miembrana mozhu nie zakranajecca, piša navukovy časopis Science.
Daśledčyki z Kalifarnijskaha ŭniviersiteta raspracavali mikrapryładu, jakaja ad kampjutara padaje hukavyja chvali mozhu, i prateściravali jaje na małpach.
Pierad ekśpierymientam žyvioł navučyli hladzieć u adnu kropku ŭ centry ekrana, kali ŭ pravym ci levym kucie źjaŭlaŭsia sihnał. Zatym centralnaja kropka źnikała, a małpy musili pieravieści pohlad na miesca, dzie ŭźnik sihnał.
U inšym ekśpierymiencie žyvioły pavinny byli ruchać džojścik u kirunku da kropki, što źjaŭlałasia na ekranie.
Ultrahukavoje skanavańnie mozhu pakazvała niejronnuju aktyŭnaść, kali mozh žyvioł rychtavaŭsia da ruchu. Zatym kampjutarny ałharytm vyjaŭlaŭ z dapamohaj atrymanych ultrahukavych źviestak namiery žyvioł. Jon moh vyznačyć, kali małpy źbiralisia źmianiać kirunak pohladu abo praciahvać łapu.
Vyniki mieli vysokuju dakładnaść. Kampjutar vyznačaŭ nakirunak ruchu dla vačej z dakładnaściu ŭ 78%, a dla łap — z 89%.
Navukoŭcy źbirajucca praciahvać raźvivać hetu technałohiju i pasprabujuć prymianić jaje dla rabatyzavanych pratezaŭ.
Ciapier čytajuć
Dla kaho sabralisia budavać vielizarny vantavy most u Minsku?3
Kamientary