«Tam stolki paranienych rasijan lažyć — prosta žach. Strašna źniaviečanyja. Ich stohn na ŭvieś špital niemahčyma słuchać»
Z terytoryi Homielščyny ŭžo vyvieźli ŭ Rasiju zvyš 2 500 miortvych vajskoŭcaŭ, spasyłajučysia na svaje krynicy, paviedamlaje «Svaboda».
U balnicach Homielskaj vobłaści praciahvajuć lačyć paranienych rasijskich vajskoŭcaŭ. Jak paviedamlajuć miascovyja žychary, ich z Ukrainy pryvoziać jak pa ziamli, tak i pa niebie — viertalotami ŭ Naroŭlu. Dalej viazuć u Mazyr i Homiel. Trupy — ciahnikami i samalotami ŭ Rasiju.
«Byli z bytavoj ranaj u mazyrskim špitali. Tam stolki paranienych rasijan lažyć — prosta niejki žach. Strašna źniaviečanyja. Ich stohn na ŭvieś špital niemahčyma słuchać», — raskazała krynica ŭ Homielskaj vobłaści.
«Za niadzielu tolki ŭ Mazyry praviali apieracyi kala sotni rasijan. Užo ŭ paniadziełak «padkinuli» u špital jašče bolš. Na ich lačeńnie, na chirurhičnyja apieracyi kinutyja ŭsie lekary, u tym liku i terapieŭty, i otałarynhołahi. Miascovym dapamoha, praŭda, akazvajecca, ale nieŭzabavie z hetym mohuć być prablemy», — padzialiłasia krynica, zaviazanaja ź miedycynaj u Mazyry.
Pa śviedčańniach krynic, infarmacyja niepasredna ad miedykaŭ nie vychodzić — navat miedycynskija siostry davali padpisku ab maŭčańni, bajacca skasavańnia kantraktu.
U Naroŭli tym časam razhornuty paŭnavartasny palavy špital.
«Na terytoryi byłoj aŭtabazy — mnostva vajskovych namiotaŭ. Tam ža ŭ ich i palavaja kuchnia, i pralnia. Paličyć paranienych naŭrad ci mahčyma, ale ich tam jaŭna sotni. Miascovych tudy i blizka nie padpuskajuć. Dzieci niejkija krucilisia, moža, niešta zdymali — dyk ich milicyja «paviazała«, da baćkoŭ potym pryjazdžali. Štodzień nad palavym špitalem kružlajuć viertaloty, jakija prylatajuć z Ukrainy. Skłałasia ŭražańnie, što paranienych stali pryvozić nie tolki na PAZ z čyrvonym kryžam, jak raniej, ale i na viertalotach. U Naroŭli paranienyja doŭha nie zatrymlivajucca. Ich tut «padłatajuć» i viazuć na Mazyr, Homiel. Trupy — na ciahniki z Mazyra i ŭ Rasiju», — raskazali naraŭlancy.
Inšaja krynica z Naroŭli śviedčyć, što z rajcentra chočuć zrabić niešta kštałtu vajskovaha haradka.
«Ciapier u nas vielmi šmat techniki i vajskoŭcaŭ. Jany zajmajuć roznyja abjekty, jakija nie vykarystoŭvajucca. Na bazie byłoha rajzaha (rajonnaje tavarystva narychtovak. — RS) ramantujuć złamanuju ŭ bajach va Ukrainie techniku», — raspaviała krynica.
Miedyk z Homiela na ŭmovach ananimnaści paviedamiła «Svabodzie», što płanavaja dapamoha žycharam Homla i Mazyra akazvajecca.
«U ludziej jość panika, ale pakul i dapamoha akazvajecca, i lekaŭ chapaje. Što dalej budzie, pakul nieviadoma. Miarkujecca, što buduć prablemy z supraćsłupniakovymi preparatami», — zaznačyła miedyk.
Jašče adna krynica paviedamiła, što pa stanie na kaniec minułaha tydnia z terytoryi Homielskaj vobłaści vyvieźli bolš za 2 500 trupaŭ — ciahnikami i samalotami na Rasiju.
«Svaboda» ŭžo nie adnojčy davała infarmacyju pra toje, što morhi Mazyra i Homiela pierapoŭnienyja ciełami rasijskich vajskoŭcaŭ. Abviaržeńnia hetaj infarmacyi z boku biełaruskich ci rasijskich uładaŭ nie było.
Na BT 12 sakavika vyšaŭ siužet, u jakim karespandenty nazyvajuć trupy rasijskich vajskoŭcaŭ u morhach Mazyra fejkam.
Alaksandr Łukašenka śćviardžaŭ, što lačeńnie ŭ Biełarusi atrymali kala 160-170 rasijan, paranienych u bajach z ukraincami. «My lačyli i budziem lačyć hetych dziaciej — u Homieli, Mazyry i, pa-mojmu, niejkim rajonnym centry», — kazaŭ Łukašenka 1 sakavika.
Rasija pačała ŭzbrojenaje ŭvarvańnie va Ukrainu 24 lutaha, u tym liku z terytoryi Biełarusi.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady46
Kamientary