Rasijski miljarder Aleh Cińkoŭ, bahaćcie jakoha aceńvałasia časopisam Forbes u 2021 hodzie ŭ 4,7 miljarda dalaraŭ, znoŭ vystupiŭ suprać vajny va Ukrainie. U svaim Instagram jon napisaŭ, što nie viedaje ni adnaho čałavieka, jaki atrymlivaŭ by ad jaje vyhadu, i nazvaŭ jaje varjackaj.
«Hinuć nievinavatyja ludzi i sałdaty, — napisaŭ Cińkoŭ. — Hienierały, pračnuŭšysia z pachmiella, zrazumieli, što ŭ ich haŭno-armija. … Kramloŭskija čynoŭniki ŭ šoku, što nie tolki jany, ale i ich dzieci ciapier letam nie pajeduć na Mižziemnaje mora. Biznesmieny sprabujuć ratavać reštki majomaści».
Pa słovach Cińkova, Rasija zahrazła ŭ niepatyźmie, chałujstvie i čynašanavańni. «A adkul armija budzie dobraja, kali ŭsio astatniaje ŭ krainie haŭno?», — napisaŭ jon.
Na jahonuju dumku, 90 pracentaŭ nasielnictva krainy suprać vajny, a litaru Z u jaje padtrymku «malujuć tolki debiły».
Jon zaklikaŭ «kalektyŭny Zachad» dać prezidentu Rasiei Uładzimiru Pucinu «zrazumieły vychad ź situacyi», jaki dazvoliŭ by palityku «zachavać svoj tvar» i spynić masavaje zabojstva. «Kali łaska, budźcie bolš racyjanalnymi i humannymi», — napisaŭ biznesoviec.
Cińkoŭ staŭ adnym z najbahaciejšych ludziej Rasii paśla vyvadu na biržu zasnavanaha im Tińkoff Banka, jaki staŭ adnoj z najbujniejšych rasijskich kredytnych arhanizacyj.
Pa padlikach Forbes, paśla pačatku vajny z Ukrainaj jon źbiadnieŭ u piać razoŭ i pa stanie na sakavik pierastaŭ być miljarderam. A ŭ kancy sakavika trapiŭ u sankcyjny śpis Vialikabrytanii.
28 lutaha biznesmen užo vykazvaŭsia suprać vajny.
«Ciapier u Ukrainie hinuć niavinnyja ludzi kožny dzień. Heta niemahčyma i niedapuščalna! Dziaržavy pavinny marnavać hrošy na lačeńnie ludziej, na daśledavańni pieramohi nad rakam, a nie na vajnu. My suprać hetaj vajny!» — napisaŭ jon tady.
Ciapier čytajuć
Što Babaryka i Kaleśnikava adkazali na pytańni pra vajnu88
Kamientary