Čechija pa ekanomicy amal dahnała Francyju, a Rumynija ŭžo bolš paśpiachovaja za Rasiju
Ale Biełaruś, Rasija i Ukraina apošnija dziesiać hadoŭ taptalisia na miescy.
Aleh Icchoki, ruski i amierykanski ekanamist, źviarnuŭ uvahu na pakazalny fakt: Rumynija abahnała Rasiju pa VUP na dušu nasielnictva, piša thinktanks.by.
VUP Rumynii ŭ 2020 hodzie na dušu nasielnictva składaŭ 12,9 tys. dołaraŭ, u Rasii — 10,1 tys., u Biełarusi — 6,4 tys. dołaraŭ.
Ale ž Rumynija — heta kraina biez pryrodnych resursaŭ, jana zaŭsiody była satelitam Savieckaha sajuza, pryčym adnym z samych biednych.
Aleh Icchoki padkreśliŭ, što ekanomiki ŭsich krain Uschodniaj Jeŭropy, za vyklučeńniem Biełarusi, Ukrainy i Rasii, ruchajucca pa adnoj ahulnaj trajektoryi.
Hetaje pastupalnaje raźvićcio z prykładna čatyrochpracentnym rostam štohod na praciahu apošnich 25—30 hadoŭ.
Tam nie było skačkoŭ rostu z nastupnaj recesijaj, jak u Biełarusi i Rasii.
I ruchajučysia płaŭna napierad, Uschodniaja Jeŭropa dasiahnuła vynikaŭ, jakija ŭražvajuć.
Čechija pa VUP na dušu nasielnictva ŭžo praktyčna dahnała Francyju — jon składaje 95% ad francuzskaha.
Heta značyć, faktyčna jana pierajšła ŭ razrad raźvitych krain. Choć Čechija taksama była «małodšym bratam» Savieckaha sajuza.
Za Čechijaj iduć Estonija, Słavienija — siońnia heta sapraŭdy bahatyja krainy. Potym iduć Polšča, Vienhryja, Słavakija. A za imi padciahvajecca Rumynija, a taksama jašče adstajuć Sierbija i Bałharyja.
«Usie jany ruchajucca pa tych ža trajektoryjach. Kali my pahladzim, dzie znachodzicca Rumynija — jana prosta na dziesiać hadoŭ adstaje ad Čechii. A Bałharyja i Sierbija adstajuć jašče na 5 hadoŭ. Moža być, kali projdzie 10 hadoŭ raźvićcia, jany dahoniać Francyju», — prahnazuje ekanamist.
Dla suśvietnaj ekanomiki heta ŭnikalnaja situacyja. Tamu što ŭ śviecie praktyčna nie było krain, jakija zaviaršyli pierachod ad stanu krain, što raźvivajucca, da raźvitych.
Z bujnych krain my možam kazać tolki pra Paŭdniovuju Kareju, jakaja zaviaršyła hety pierachod. A ciapier ceły rehijon skončyć svaju transfarmacyju ŭ raźvityja krainy — za košt zachodniejeŭrapiejskaha instytucyjnaha pryciahnieńnia.
Va Ukrainy, Biełarusi i Rasii pavinien byŭ być padobny šlach raźvićcia. Ale apošnija 10—12 hadoŭ hetyja ekanomiki praktyčna nie rastuć. Skačok rostu ŭ 2000-ch pryvioŭ da mocnaj terytaryjalnaj niaroŭnaści, kali bahaćcie kancentravałasia ŭ bujnych haradach, a za ich miežami ludzi žyli biedna.
Kali pahladzieć na Polšču ci Rumyniju — tam rost značna bolš raŭnamierny. Hetyja krainy pieratvarajucca pa svajoj struktury ŭ svajho rodu Niamieččynu, chacia biadniejšuju. Niamieččynu, dzie niama haradoŭ, jakija mocna vydzialajucca i značna apiaredžvajuć sielskuju miascovaść. Paniaćcie sielskaj miascovaści ŭ Hiermanii — heta bahatyja vioski, dzie žyvuć bahatyja ludzi.
Va Uschodniaj Jeŭropie raŭnamierny rost stvaraje vialiki siaredni kłas. I heta toje, što było b u intaresach i Biełarusi, i Ukrainy, i Rasii.
Adnak roźnica ŭ palityčnym ładzie abumoviła skatvańnie na inšuju trajektoryju, ličyć Aleh Icchoki.
Kamientary