«Bajpoł» raskryŭ detali pra kamandujučaha vajskovaj avijacyjaj i nazvaŭ, chto viadzie telehram-kanały vajskovych baz
U rasśledavańni «Bajpoła» śćviardžajecca, što ciapierašni kamandujučy vajskovaj avijacyjaj Biełarusi atrymaŭ biełaruskaje hramadzianstva pa paskoranaj pracedury.
Andrej Łukjanovič 9 hadoŭ kamandavaŭ 50-j źmiešanaj avijabazaj, jakaja dysłakujecca ŭ Mačuliščach, dzie byŭ sioleta atakavany i paškodžany rasijski vajskovy samalot. Za dva miesiacy da napadu Rasii na Ukrainu Łukjanoviča pazbavili pasady. Ale 13 śniežnia 2022 hoda Łukašenka jaho pryznačyŭ kamandujučym vojskami supraćpavietranaj abarony i Vajskova-pavietranymi siłami krainy.
Pavodle «Bajpoła», Łukjanovič atrymaŭ biełaruskaje hramadzianstva pa paskoranaj pracedury ŭ krasaviku 2000 hoda. Tady vajskoŭcu było 30 hadoŭ.
Abjadnańnie byłych siłavikoŭ śćviardžaje, što aficyjnyja danyja ab naradžeńni Łukjanoviča ŭ Smarhoni niepraŭdzivyja. U svaim roliku jany prademanstravali dakumient z KDB, u jakim paznačana, što jon naradziŭsia 29 vieraśnia 1970 hoda ŭ Kazachstanie.
Da atrymańnia biełaruskaha hramadzianstva Łukjanovič šeść hadoŭ słužyŭ u rasijskim vojsku. U Rasii skončyŭ Bałašoŭskaje vyšejšaje vajskovaje avijacyjnaje vučylišča.
Starejšy jaho syn Jaŭhien vyjechaŭ na pastajannaje miesca žycharstva ŭ Rasiju. Tam skončyŭ instytut hramadzianskaj avijacyi va Uljanaŭsku, a ciapier pracuje druhim piłotam na samalocie rasijskaj avijacyi Boeing 747. Dačka ž Łukjanoviča Anastasija vučycca ŭ Hiermanii.
Ciapier bazaj u Mačuliščach kamanduje Uładzimir Skorkin.
Jaho namieśnik pa ideałohii Andrej Pučko kuryruje telehram-kanał bazy, dzie rehularna źjaŭlajucca rasijskija prapahandysckija materyjały pra vajnu va Ukrainie. Pučko ličyć Kastusia Kalinoŭskaha šavinistam, a paŭstańnie pad jaho kiraŭnictvam — miaciažom suprać Rasijskaj Impieryi i pravasłaŭja.
Resursy 61-j źniščalnaj avijabazy, jakaja dysłakujecca pad Baranavičami, byli zadziejničanyja ŭ padtrymcy poŭnamaštabnaj ahresii Rasii suprać Ukrainy. U pieršyja miesiacy vajny z aeradroma hetaj bazy vylatali rasijskija samaloty bambić susiedniuju krainu.
Niezadoŭha da pačatku vajny kamandzir avijabazy pałkoŭnik Juryj Pyžyk na aeradromie sustrakaŭ z chlebam i sollu rasijsich lotčykaŭ.
Miesca Pyžyka ŭ mai 2022 hoda zaniaŭ pałkoŭnik Leanid Davidovič. Pavodle «Bajpoła», jon vučyŭsia ŭ 2005—2007 hadach u rasijskaj Vajskova-pavietrannaj akademii imia Haharyna, a ŭ 2016—2018 hadach udaskanalvaŭ viedy ŭ Vajskovaj akademii Hienieralnaha štaba Rasii.
Nampalit 61-aj avijacyjnaj bazy padpałkoŭnik Michaił Skačko, pavodle «Bajpoła», kuryruje telehram-kanał vajskovaj čaści, u jakim pastajanna raźmiaščajucca źniavažlivyja materyjały pra Ukrainu i jaje Uzbrojenyja siły. Publikacyi supravadžajucca simvolikaj rasijskaj ahresii.
Skačko, śćviardžaje «Bajpoł», u telehram-kanale «rekłamuje pryvatnuju vajskovuju kampaniju «Vahnier».
«Bajpoł» ličyć, što dziejańni fihurantaŭ ich rasśledavańnia padpadajuć pad kryminalnuju adkaznaść za prapahandu vajny, a taksama raspalvańnie rasavaj, nacyjanalnaj, relihijnaj abo sacyjalnaj varožaści ci varažniečy.
«Bajpoł» — abjadnańnie byłych siłavikoŭ Biełarusi, jakija vystupajuć suprać palityki Łukašenki, za praviadzieńnie novych prezidenckich i parłamienckich vybaraŭ na asnovie demakratyčnych pryncypaŭ.
«Naša Niva» — bastyjon biełaruščyny
PADTRYMAĆHladzicie taksama:
U Minabarony raspaviali, kolki ŭkrainskich vajskoŭcaŭ znachodzicca kala hranic ź Biełaruśsiu
Prapahandysty pakazali «žyvy i zdarovy» rasijski samalot A-50. Ale jość važnyja niuansy
Kamientary