Zima na nosie, a pasolstva Biełarusi ŭ Litvie nie moža znajści sabie pastaŭščyka hazu — ź im admaŭlajucca supracoŭničać
Jak stała viadoma «Našaj Nivie» ad infarmavanaj krynicy, pasolstva Biełarusi ŭ Vilni ŭvachodzić u bałtyjskuju vosień u niapeŭnaj kandycyi — nie mohuć damovicca ź litoŭskim pastaŭščykom hazu. Imavierna, pa palityčnych pryčynach.
Jak paviedamiŭ nam surazmoŭca, u ambasady nie vyjšła damovicca z najbujniejšym pastaŭščykom enierhii ŭ Litvie — «Ihnicisam». Heta kampanija i z pryvatnaj, i ź dziaržaŭnaj dolami.
Imavierna, havorka idzie pra palityčnyja pryčyny: Litva zaniała pryncypovuju pazicyju adnosna režymu Łukašenki, praz što stała achviaraj kampanii pa raspalvańni nianaviści ŭ Biełarusi, a taksama zaznała ataku mihrantaŭ na svaju miažu z boku režymu Łukašenki.
U toj ža čas niadaŭna Łukašenka padpisaŭ ukaz, jaki pazbaŭlaje dyppradstaŭnictva častki funkcyjanału — ambasady bolš nie mohuć mianiać i vydavać pašparty, dla hetaha treba viartacca ŭ Biełaruś.
Jak viadoma «Našaj Nivie», ambasada sprabuje znajści inšaha pastaŭščyka. Pastaŭščyki enierhii ŭ Litvie kankurujuć miž saboj, ale i sami prymajuć rašeńni.
Viadoma, što štat biełaruskaha pasolstva ŭ Vilni mocna skaročany, čakać vyrašeńnia banalnych pytańniaŭ hramadzianam Biełarusi, jakija žyvuć u Litvie, davodzicca miesiacami.
Biełaruskaje pasolstva ŭ Vilni raźmieščana ŭ pryhožym budynku. Pad płotam stajać dziasiatki partretaŭ zabitych i źniavolenych biełarusaŭ, vałanciory rehularna zapalvajuć śviečki. Nasuprać budynka — murał z palitviaźniem, nobieleŭskim łaŭreatam Alesiem Bialackim.
«Naša Niva» — bastyjon biełaruščyny
PADTRYMAĆCiapier čytajuć
Achviary intehracyi. Rasija biaspłatnymi pucioŭkami i praz Rassupracoŭnictva zavablivaje biełaruskich dziaciej20
Kamientary