«Pacyjenty ŭ stabilnym stanie». U Salihorskaj balnicy raskazali ab paciarpiełych u vyniku zdareńnia na šachcie «Biełaruśkalija»
Kamientar hałoŭnaha doktara Salihorskaj centralnaj rajonnaj balnicy Alaksandra Kisiala nakont situacyi z harniakami, jakija atrymali traŭmy ŭ vyniku zdareńnia ŭ šachcie, apublikavała ŭ svaim telehram-kanale Minzdaroŭja.
Alaksandr Kisiel raskazaŭ, što viečaram u balnicu pryvieźli piaciarych rabotnikaŭ AAT «Biełaruśkalij». Va ŭsich byli dyjahnastavanyja paškodžańni roznaj stupieni ciažkaści, atrymanyja ŭ vyniku padzieńnia z vyšyni.
Pacyjentam praviali nieabchodnuju dyjahnostyku i akazali dapamohu.
Pa rasparadžeńni ministra achovy zdaroŭja dla akazańnia kansultatyŭnaj i praktyčnaj dapamohi daktaram u Salihorskuju CRB prybyli śpinalny chirurh i traŭmatołah-artapied RNPC traŭmatałohii i artapiedyi, a taksama traŭmatołah Minskaj abłasnoj balnicy. Adnamu z pacyjentaŭ spatrebiłasia apieracyja pa stabilizacyi pajaśničnaha adździeła chrybietnika, jakaja była vykanana va ŭmovach Salihorskaj CRB.
Zaraz pacyjenty ŭ stabilnym stanie, pad dynamičnym nahladam profilnych śpiecyjalistaŭ.
Zdareńnie na «Biełaruśkalii» adbyłosia ŭčora ŭviečary. Tam zachrasła kleć u šachtavym stvale № 3 na adznacy minus 445 mietraŭ na terytoryi 2-ha rudaŭpraŭleńnia. U kleci było piać rabotnikaŭ pradpryjemstva, jakich potym padniali na pavierchniu.
Adnaho z rabotnikaŭ, 32-hadovaha mužčynu, adrazu špitalizavali, papiarednie daktary dyjahnastavali ŭ jaho paškodžańnie chrybta. Druhi paciarpieły mieŭ pierałom chrybta i kancavin. Paźniej u salihorskuju balnicu dastavili i astatnich šachcioraŭ. Va ŭsich byli ciažkija spałučanyja traŭmy — pierałomy klučyc, chrybta, taza i nižnich kancavin.
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary