U Hrodnie biełarusu i rasijaninu dali dzikija terminy za «padrychtoŭku dyviersij»
U Hrodzienskim abłasnym sudzie z 26 lutaha ŭ zakrytym režymie za «padrychtoŭku dyviersij» sudzili biełarusa Vadzima Pacenku i hramadzianina Rasii Alaksieja Kulikova. Ich abvinavačvali ahułam pa piaci ciažkich artykułach Kryminalnaha kodeksa, u tym liku pavodle č. 3 art. 126 (akt mižnarodnaha teraryzmu) i art. 358-1 (ahienturnaja dziejnaść). 11 krasavika Valer Ramanoŭski ahučyŭ prysud, daviedałasia «Viasna».
Vadzima Pacenku asudzili da 21 hoda kałonii, a Alaksieja Kulikova — da 23 hadoŭ źniavoleńnia. Apošniaje słova Kulikoŭ pramoviŭ pa-ŭkrainsku, a Pacenka zajaviŭ «ab najaŭnaści ŭ jaho dziejańniach palityčnaj padkładki», paviedamlajuć praŭładnyja telehram-kanały, niehledziačy na toje, što sud byŭ zakryty.
Viadoma, što 22-hadovy Vadzim Pacenka rodam sa Śvisłačy, ale žyŭ u Hrodnie. Viadoma, što mužčyna zajmaŭsia sportam, u tym liku pradstaŭlaŭ rodny horad na junijorskim spartyŭnym mnahaborji.
Zatrymali Pacenku 3 sakavika 2023 hoda. U praŭładnym filmie «Haspar nie vyšieł na śviaź» zajavili, što jon nibyta pavinien byŭ ździejśnić dyviersiju ŭ Hrodnie. Na kadrach dopytu jon kaža, što jamu «pastavili zadaču padarvać naftabazu z dapamohaj drona i vybuchoŭki». Užo tady zajavili, što jamu inkryminujuć č. 2 art. 289 KK (akt teraryzmu).
Hramadzianinu Rasijskaj Fiederacyi Alaksieju Kulikovu 36 hadoŭ. U tym ža praŭładnym filmie raskazali, što hod tamu Kulikoŭ źbieh ad pryzyvu, a trapić u Hrodna jamu dapamoh rasijski apazicyjanier Daniił Krynary (Kavaleŭski).
Kulikova zatrymali 26 lutaha 2023 hoda. Pa viersii KDB, Alaksiej zdymaŭ na fota abjekty ŭ Hrodnie dla «ŭkrainskich śpiecsłužbaŭ» — vajenkamat Hrodna i Hrodzienskaha rajona, vajskovuju čaść 41780, naftabazu rajona Auls, naftabazu rajona Dzieviatoŭka, hienkonsulstva RF. Kulikovu vystavili abvinavačvańni pavodle č. 2 art. 289 (akt teraryzmu) i č. 2 art. 126 (akt mižnarodnaha teraryzmu) Kryminalnaha kodeksa.
Viadoma tolki, što mužčyny razam pracavali.
Vadzima Pacenku i Alaksieja Kulikova ahułam abvinavacili pa nastupnych artykułach Kryminalnaha kodeksa:
- č. 3 art. 289 (akt teraryzmu);
- č. 3 art. 126 (akt mižnarodnaha teraryzmu);
- art. 358-1 (ahienturnaja dziejnaść);
- č. 1 art. 356 (zdrada dziaržavie);
- č. 1 art. 130 (raspalvańnie inšaj sacyjalnaj varožaści).
Ciapier čytajuć
Ź Ministerstva kultury zvolnili pieršaha namieśnika Markava2
Kamientary
Ukraincy dajuć terminy akupantam pa 15 hadoŭ za dakazanyja zabojstvy, a tut tak zvany zakryty sud daje 21-23 hady.