Saša Filipienka: Baćka chodzić na dopyty

«Kali baćka apynuŭsia na svabodzie, z tydzień usie vydychali, a potym my parazmaŭlali i pastanavili, što ja budu praciahvać rabić toje, što rablu.

Heta vielmi biazhłuzda b vyhladała: ja 10 hadoŭ kažu pra toje, što adbyvajecca ŭ Biełarusi, a kali kranułasia majoj siamji, byccam adrazu zmoŭk. Nielha spyniacca, bo heta nie tolki pra maju siamju, a pra sotni tysiač siemjaŭ u Biełarusi.

Baćka chodzić na dopyty, mnie zdajecca, u jaho stakholmski sindrom, bo jon mnie skazaŭ: «U ciabie takaja dobraja śledčaja». Jana ŭ jaho zapytała, «ci hanarycca Saša Biełaruśsiu»,

i baćka adkazaŭ, što tak, viadoma, Saša hanarycca Biełaruśsiu i było b dobra, kab Biełaruś pačała hanarycca im.

Heta ciažkaje pytańnie, kožny dzień ty razumieješ, što paśla jakoha-kolviek čarhovaha intervju jaho mohuć iznoŭ zatrymać», — skazaŭ Filipienka.

***

Baćku biełaruskaha piśmieńnika Sašy Filipienki zatrymali ŭ listapadzie 2023 hoda ŭ Minsku siłaviki i na 13 sutak źmiaścili na Akreścina — farmalna za repost z «Lusterka», ale faktyčna za publičnuju dziejnaść syna.

«Adnojčy patelefanavaŭ mužčyna, jaki siadzieŭ z maim baćkam u adnoj kamiery i ciapier užo na voli. Jon skazaŭ, što moj baćka vielmi advažny, što jon padbadziorvaŭ i padtrymlivaŭ svaich sukamiernikaŭ, zaŭsiody žartavaŭ. Mužčyna taksama skazaŭ, što baćka mocna niepakoicca za nas z mamaj, cikavicca, jak našy spravy. Ja vielmi hanarusia im i viedaju, što jon taksama mnoj mocna hanarycca», — raskazvaŭ tady Saša Filipienka.

Piśmieńnik taksama raspavioŭ pra toje, jak mienavita prachodziła zatrymańnie baćki. Jon adznačyŭ, što kanfiskavany siłavikami telefon jaho mamy paśla pieratrusu ŭsio jašče bačny ŭ anłajnie.

«Uzbrojenyja ludzi ŭvarvalisia ŭ kvateru da maich baćkoŭ i zahadali im lehčy na ​​padłohu, nadzieli na ich kajdanki. Majmu baćku 62 hady, a maci — 60. Zanadta žorstka, uličvajučy, što maje baćki nijak nie mahli naškodzić vaśmi siłavikam sa zbrojaj. 

Maje baćki nie mahli mnie patelefanavać, bo ŭsie telefony zabrali. Ja padtrymlivaŭ suviaź z mamaj praz susiedziaŭ i maju babulu. Kanfiskavany telefon mamy, darečy, usio jašče možna ŭbačyć u anłajnie», — kazaŭ Filipienka.

Saša Filipienka — viadomy biełaruski piśmieńnik, žurnalist i publicyst. Aŭtar knih «Były syn», «Kremulatar», «Čyrvony Kryž», «Viartańnie ŭ astroh», «Ckavańnie». Jahonyja ramany pierakładzienyja na mnohija movy. Filipienka rezka krytykuje ŭłady Biełarusi i Rasii. Z 2004 da 2020 hoda žyŭ u Rasii, dzie pracavaŭ u niezaležnych ŚMI. 

Uletku 2023 hoda ŭ Vilni była pastaŭlena jaho pjesa «Cichary» pra padziei ŭ Biełarusi ŭ 2030 hodzie. Pa siužecie nastaŭ apakalipsis, ale navat jon nie spyniŭ palityčnych sudoŭ, jakija pravodziać u bunkiery.

Siońnia ŭ vilenskim teatry «Avgusta» na Antokali adbudziecca čarhovy jaje pakaz.

Niadaŭna Saša Filipienka raskazaŭ, što zaraz jaho tvory buduć vychodzić pa-biełarusku.

• 3
• 0
• 0
• 1
• 0
• 4
• 12
• 0