«Štadler» nie maje namieru pradavać zavod u Fanipali. Choć biełaruskija čynoŭniki śćviardžali inšaje
Šviejcarskija ŚMI apublikavali intervju byłoha člena Nacyjanalnaj rady krainy, hałoŭnaha vykanaŭčaha dyrektara Stadler Rail AG Pietera Špulera, jaki prakamientavaŭ płany biełaruskich uładaŭ pa źmienie ŭłaśnika pradpryjemstva ŭ pryharadzie Minska. Biznesoviec admaŭlaje mahčymuju źmienu ŭłaśnika biełaruskaha zavoda, piša Tochka.by.
Niadaŭna były ministr transpartu i kamunikacyj, a ciapier namieśnik kiraŭnika ŭrada Anatol Sivak zajaviŭ pra toje, što zavod staŭ biełaruskim.
«Upeŭnieny, što my budziem i dalej jeździć na ruchomym składzie, jaki budzie vyrablać heta biełaruskaje pradpryjemstva», — skazaŭ čynoŭnik, kamientujučy pierśpiektyvy zapusku spynienaha pradpryjemstva.
Paśla ministr transpartu i kamunikacyj Alaksiej Lachnovič zapeŭniŭ u tym, što zavod u Fanipali stanie nie šviejcarskim, a biełaruska-rasijskim.
«Ciapier my razam z čyhunkaj prapracoŭvajem pytańnie pa tym, kab pačać na adnym z pradpryjemstvaŭ respubliki bujnavuzłavuju zborku matorvahonnaha ruchomaha składu albo stvaryć niejkaje sumiesnaje tavarystva dla taho, kab adnavić vytvorčaść na «Štadlery», — zajaviŭ ministr transpartu.
Raźvivajučy temu, rasijskija, a ŭśled za imi i biełaruskija ŚMI raskazali pra toje, što havorka moža iści pra «Trasnmašchołdynh» (naležyć na 4/5 kampanijam Iskandera Machmudava, Andreja Bokarava, Dźmitryja Kamisarava i Kiryła Lipa, 20% kapitału ŭ francuzskaj Alstom) i «hrupie Sinara» (asnoŭny ŭładalnik Dźmitryj Pumpianski, jaki aficyjna vyjšaŭ z kiraŭnictva ŭ sakaviku 2022-ha), jakija znachodziacca pad sankcyjami Ukrainy i ZŠA, ale nie Jeŭrasajuza i Šviejcaryi.
Kamientujučy naviny, jakija pastupajuć ź Biełarusi i Rasii, kiraŭnik Stadler Rail AG adznačyŭ, što kampanija «zaŭsiody vykonvała sankcyi na 100%», a taksama davoli niečakana zajaviŭ, što niama absalutna nijakich prykmiet taho, što «ŭ Biełarusi jość niejkija płany ŭ źmienie struktury ŭłasnaści našaha minskaha zavoda».
Pradstaŭnik Stadler Mark Miešenmozier dadaŭ, što prodaž zavoda ŭ našaj krainie nie płanujecca, a kampanija nie ŭdzielničała ni ŭ jakich dyskusijach pamiž pradstaŭnikami biełaruskaha ŭrada i rasijskimi kampanijami. Akramia taho, Miešenmozier u čarhovy raz paviedamiŭ, što paśla ŭviadzieńnia ŭ 2021 hodzie sankcyj suprać biełaruskich uładaŭ Stadler rełakavaŭ bolšuju častku vytvorčaści i piersanału ź Biełarusi ŭ ES.
Pavodle jaho słoŭ, na zavodzie ŭ Fanipali, jaki aficyjna nie spyniŭsia, z 2000 rabočych ciapier pracuje kala 200 čałaviek, jakija zajmajucca miechanazboračnymi rabotami.
Što da mižnarodnaj karparacyi Stadler Rail, to jana aktyŭna raście i pašyraje rynki zbytu. Da prykładu, u lutym stała viadoma, što vytvorca čyhunačnych i mietrovahonaŭ dy łakamatyvaŭ zaklučyŭ bujnuju ździełku ŭ Saudaŭskaj Aravii. Košt zamovy składaje kala 600 młn šviejcarskich frankaŭ.
Tydzień tamu Stadler pakazała na mižnarodnaj vystavie InnoTrans-2024 hruzavy hibrydny łakamatyŭ dla Vialikabrytanii i mietrapojezd dla Bierlina. A litaralna ŭčora ministr transpartu Uźbiekistana Iłchom Machkamaŭ paviedamiŭ, što Uźbiekistan razhladaje nabyćcio ciahnikoŭ Stadler, i prajekt vyjšaŭ na finišnuju pramuju: budzie praviedziena vopytnaja ekspłuatacyja dvuch elektraciahnikoŭ.
U ramkach pahadnieńnia šviejcarcy razhladajuć varyjant z łakalizacyjaj vytvorčaści ŭ hetaj krainie.
Kamientary