Zastałosia dva dni kinafiestyvalu «Paŭnočnaje źziańnie». Što jašče možna paśpieć pahladzieć anłajn?
U apošnija dni kinafiestyvalu «Paŭnočnaje źziańnie» hledačoŭ čakajuć filmy pra Miunchienskuju Alimpijadu, kunh-fu, siamiejnyja dramy i biełaruskaja antyŭtopija.
20 listapada
«Pałajučy raj»
2023, Šviecyja, Danija, Finlandyja, Italija
Režysior: Mika Hustaŭson
U rabočym rajonie Šviecyi try siastry — 16-hadovaja Łaura, 12-hadovaja Mira i 7-hadovaja Štefi — žyvuć, pakinutyja sami sabie. Ich niadbajnaja maci čarhovy raz źnikła bieź viestak, ale dziaŭčynki asabliva pra heta nie turbujucca. U ich daŭno skłałasia siastrynskaja supolnaść sa svaimi praviłami i dakładna raspracavanaja sistema kradziažoŭ z kramaŭ. Ich budni iduć svaim chodam, pakul nie źjaŭlajucca sacyjalnyja słužby.
Dzie hladzieć: online z 00:00 da 23:59
«Siurpryz»
2023, Šviecyja
Režysior: Łerkie Hiertoni
Inhryd, paśpiachovaja aktrysa, biez papiaredžańnia pryjazdžaje na 35-hodździe svajoj dački, ź jakoj amal nie padtrymlivała stasunki apošnija niekalki hadoŭ. Padčas adnaho viečara žančyna pieražyvaje balučaje ŭśviedamleńnie taho, što ichniaja suviaź, zdajecca, stračana nazaŭsiody.
Dzie hladzieć: online z 00:00 da 23:59
«Pracesy»
2023, Polšča
Režysior: Andrej Kašpierski
Što budzie, kali tyja pracesy, što ciapier adbyvajucca ŭ Biełarusi i ź biełarusami, nie spyniacca i dojduć da absurdu? O dzivosny novy śviet: «čornaja» satyra-antyŭtopija pa-biełarusku. Kalekcyja kafkijanskich aniekdotaŭ pra hramadstva, jakoje žyvie pad łozunhami «Vajna — heta Mir, Svaboda — heta Rabstva, Niaviedańnie — heta Siła».
Dzie hladzieć: Talin/Tallinn, k/t Apollo Kino Coca-Cola Plaza hall 9 17:15 — kvitki
«Kut čužoha ščaścia»
2024, Hiermanija
Režysiorka: Sonia Charytaniuk
Dabradziejnaja dziaŭčyna z artadaksalnaj siamji padviarhajecca seksualnamu hvałtu. Aktualnaja tema damašniaha abjuzu zakranaje biełaruskija realii.
Dzie hladzieć: online z 00:00 da 23:59
«Rab tanca»
2024, Biełaruś
Režysiorka: Nastaśsia Aleksijevič
Siurrealistyčny tyktokierski skietč u stylistycy 80-ch pra mary i «žorstkija» realii marnatraŭcaŭ žyćcia. Filip usioj svajoj naturaj namahajecca supraćstajać pustečy dzion z dapamohaj tanca, ramantyčnaha pohladu na śviet i novaj ščyraści. Što heta: bieskłapotnaja kamiedyja ci satyra na budzionnaść?
Dzie hladzieć: online z 00:00 da 23:59
«Skroź śviatło»
2023, Polšča
Režysiorka: Viktoryja Jahorava
Dziaŭčyna na miažy niervovaha zryvu: ratujučysia ad pieraśledaŭ na radzimie, maładaja aktrysa pierajazdžaje ŭ Polšču, dzie stanovicca achviaraj seksualnaha damahańnia. Mieładrama sa ščaślivym kancom, u jakoj tema nacyjanalnaj traŭmy susiedničaje z aktualnym jeŭrapiejskim trendam baraćby žančyn za svaje pravy.
Dzie hladzieć: online z 00:00 da 23:59
21 listapada
«Faruk»
2024, Hiermanija, Turcyja, Francyja
Režysior: Asły Ozhie
Asły Ozhie robić hałoŭnym hierojem filma svajho dzievianostahadovaha baćku, Faruka, dom jakoha źbirajucca voś-voś źnieści. Źniaty ŭ aŭtentyčnych łakacyjach i zasnavany na realnych ludziach i padziejach, novy film Asły Ozhie prapanoŭvaje ŭnikalny, intymny pohlad na žyćcio staroha mužčyny ŭ dynamičnym Stambule, daśleduje nie tolki vyniki džentryfikacyi, ale i składanaści stasunkaŭ miž baćkam i dačkoj.
Dzie hladzieć: online z 00:00 da 23:59
«Niabačny boj»
2023, Estonija, Łatvija, Hrecyja, Finlandyja
Režysior: Rajnier Sarniet
1973 hod, Saviecki Sajuz. Estonski pamiežnik Rafael — adziny, chto vyžyvaje padčas raptoŭnaj ataki latajučych bajavych manachaŭ na saviecka-kitajskaj miažy. Kičavaja chevi-mietał kunh-fu kamiedyja ŭ dekaracyjach savieckaha manastyra ad tryumfatara kinafiestyvalu «Listapad» Rajniera Sarnieta.
Dzie hladzieć: online z 00:00 da 23:59
«O nie, Łase padaje!»
2023, Finlandyja
Režysior: Rysta-Pieka Błom
Miunchienskaja Alimpijada 1972 hoda. Trybuny zataili dychańnie ŭ čakańni finalnaha zabiehu na 10 000 mietraŭ. Łase Viren užo raźminajecca na starcie — heta najvažniejšy dzień nie tolki dla jaho, ale i dla ŭsioj Finlandyi. Na ščaście, za kulisami jość jašče šaściora finaŭ, jakija dapamohuć jamu ździejśnić podźvih.
Dzie hladzieć: online z 00:00 da 23:59
Padtrymać kinafiestyval «Paŭnočnaje źziańnie» i jaho dalejšaje raźvićcio možna danatam.
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary