Siem novaŭviadzieńniaŭ pa piensijach z 2025 hoda

Pavyšeńnie strachavoha stažu

Z 1 studzienia 2025 hoda ŭ Biełarusi budzie pavyšany minimalny strachavy staž da 20 hadoŭ (ciapier jon składaje 19 hadoŭ 6 miesiacaŭ). Jon nieabchodny dla atrymańnia pracoŭnaj piensii. U hety staž uličvajecca tolki toj čas, kali čałaviek pracavaŭ, a pracadaŭca płaciŭ za jaho strachavyja ŭznosy ŭ Fond sacyjalnaj abarony. Naprykład, dekretny adpačynak u hety staž nie ŭklučajecca (ale ŭ ahulny staž — tak).

Raniej minimalny strachavy staž składaŭ 5 hadoŭ, ale z 2013 hoda jaho stali rezka pavyšać. Biełarusy, jakija pavodle novych praviłaŭ nie nakapili hety staž, traplajuć u piensijnuju pastku: jany nie mohuć raźličvać na pracoŭnuju piensiju, im mohuć pryznačyć tolki sacyjalnuju (ciapier jana składaje 218,9 rubla). Žančyny mohuć atrymlivać jaje z 60 hadoŭ, a mužčyny — z 65.

Standartny piensijny ŭzrost u Biełarusi składaje 58 hadoŭ dla žančyn i 63 hady dla mužčyn. U Ministerstvie pracy napiaredadni zajavili, što pytańnie dalejšaha pavyšeńnia hetaha pakazčyka «na paradku dnia nie staić».

Źmiena dla šmatdzietnych maci

Adna ź źmien tyčycca žančyn. Kankretna jana zakranaje šmatdzietnych maci, u jakich čaćviora dziaciej. Dla ich z 1 studzienia 2025 hoda pamienšać minimalny strachavy staž — z 10 da 5 hadoŭ.

Novaŭviadzieńnie dla mužčyn

Z 2025 hoda mužčyny zmohuć vyjści na daterminovuju piensiju pa ŭzroście, kali jany vychavali dzicia ź invalidnaściu. Ale jość važnaja ŭmova — zrabili heta biez udziełu maci. Daterminovuju piensiju zamiest maci pryznačać baćku, kali jamu spoŭnicca 58 hadoŭ (žančynam — u 53 hady).

Ale dla hetaha treba vykanać niekalki patrabavańniaŭ. Pieršaje — vychoŭvać dzicia nie mienš za 8 hadoŭ. Kali pa niejkich pryčynach jano nie dažyvie da hetaha ŭzrostu, to daterminovaj piensii nie budzie (heta praviła tyčycca i žančyn). Druhoje — staž pracy nie mienš za 25 hadoŭ. Ź ich 5 hadoŭ strachavoha stažu, heta značyć, z upłataj strachavych uznosaŭ u Fond sacyjalnaj abarony. Dla maci hetyja patrabavańni adroźnivajucca — staž raboty nie mienš za 20 hadoŭ (ź ich — 5 hadoŭ strachavoha).

Niekatorych piensijanieraŭ pierastanuć rehistravać u centrach zaniataści

Z studzienia 2025 hoda taksama ŭviaduć źmieny ŭ zakanadaŭstva, jakija tyčacca zaniataści nasielnictva. Siarod inšaha čynoŭniki zabaroniać rehistracyju ŭ jakaści biespracoŭnych u centrach zaniataści tych, chto atrymlivaje sacyjalnuju piensiju.

Ciapier takoje abmiežavańnie dziejničaje dla tych, kamu vypłačvajucca piensii pa ŭzroście, za vysłuhu hadoŭ, a taksama prafiesijnyja.

Pieramieściać terminy padańnia zajaŭ na piensiju

Z 1 studzienia 2025 hoda pavialičać termin padačy zajavy dla pryznačeńnia niekatorych piensij — pa ŭzroście, za vysłuhu hadoŭ i sacyjalnych. Zajavu možna budzie padać za miesiac da piensijnaha ŭzrostu i ŭ miežach takoha ž terminu paśla jaho. Vypłaty pryznačać z toj daty, kali čałaviek dasiahnie ŭzrostu dla vychadu na zasłužany adpačynak.

Ciapier pa pryznačeńnie piensii možna źviartacca ŭ luby čas paśla taho, jak źjavicca prava na jaje. To-bok kali žančynie spoŭnicca 58 hadoŭ, a mužčynu — 63 hady (kali heta nie lhotniki). Ale kali čałaviek pryjdzie za piensijaj nie ŭ svoj dzień naradžeńnia, a paźniej, to hetyja vypłaty buduć pačynać naličvać z toj daty, kali jon źviarnuŭsia.

Zdymuć abmiežavańni dla pracujučych na piensii

Ułady admieniać stol pa pamiery vypłat dla tych, chto praciahvaje pracavać na piensii i adnačasova atrymlivaje i zarpłatu, i piensiju. U niekatorych ź ich jość abmiežavańni pa maksimalnym pamiery piensijnych vypłat. Heta tyčycca tych, u kaho da vychadu na zasłužany adpačynak była zarpłata, jakaja ŭ 1,3 razy pieravyšała siaredniuju pa krainie.

Jość takoje paniaćcie, jak indyvidualny kaeficyjent zarobku — heta suadnosiny faktyčnaj zarpłaty, jakuju čałaviek atrymlivaŭ da vychadu na zasłužany adpačynak, i siaredniaj pa krainie. Kali zarpłata kankretnaha čałavieka była ŭ paŭtara raza bolšaja za siaredniuju, to ŭ jaho hety kaeficyjent składaje 1,5, kali na ŭzroŭni siaredniaj — 1. Tak voś dla tych, chto praciahvaje pracavać na piensii, jość stol pa pamiery vypłaty — biarecca maksimalny kaeficyjent na ŭzroŭni 1,3. Navat kali ŭ kahości jon składaje 1,5 abo 2, to ŭsio roŭna dziejničajuć abmiežavańni. To-bok faktyčna čałaviek nie da atrymlivaje častku piensii, kali praciahvaje pracavać na zasłužanym adpačynku.

Jašče adno novaŭviadzieńnie dla piensij i rynku pracy

U Biełarusi ŭ niekatorych biespracoŭnych zaraz jość mahčymaść vyjści na piensiju daterminova. Rašeńnie tyčycca tych, chto byŭ zvolnieny z-za likvidacyi arhanizacyi, staŭ na ŭlik u centr zaniataści, ale nie zmoh znajści pracu. Takija ludzi zaraz mohuć vyjści na piensiju na dva hady raniej: žančyny — u 56 hadoŭ, a mužčyny — u 61 hod. Ale dla hetaha patrebna zhoda słužby zaniataści.

U 2025 hodzie dla daterminovaha vychadu na piensiju pa takim padstavam uviaduć uzmacnieńnie: pajści na zasłužany adpačynak možna budzie nie na dva hady raniej, a tolki na adzin.

• 0
• 0
• 0
• 0
• 0
• 0
• 0
• 0