«Trapili pad niachiłuju razdaču». Što ciapier adbyvajecca ŭ Kurskaj vobłaści?

U niadzielu aficyjnyja rasijskija krynicy zajavili, što armija Rasii ŭziała pad kantrol jašče try nasielenyja punkty ŭ Kurskaj vobłaści, jakija raniej byli zachoplenyja ŭkrainskimi vajskoŭcami. Napiaredadni Hienštab USU ŭśled za vajennymi błohierami i ŭkrainskimi ŚMI paviedamiŭ ab pravalnaj sprobie rasijskich šturmavych hrup uvajści ŭ horad Sudža pa hazapravodzie, piša Bi-bi-si.

U paviedamleńni, raźmieščanym u telehram-kanale rasijskaha vajskovaha viedamstva, idzie havorka pra vyzvaleńnie nasielenych punktaŭ Małaja Łoknia, Čarkaskaje Parečnaje i Kosica. Na praciahu apošnich dvuch dzion Minabarony Rasii taksama zajaviła, što rasijskija vajskoŭcy ŭziali pad kantrol vioski Labiedzieŭka, Viktaraŭka, Mikałajeŭka i Staraja Saročyna ŭ Kurskaj vobłaści i chutar Novieńkaje ŭ Sumskaj vobłaści.

Ukrainskija krynicy hetyja źviestki aficyjna nie paćviardžali, adnak na karcie aŭtarytetnaha ŭkrainskaha prajekta Deep State usie hetyja nasielenyja punkty paznačanyja jak takija, što znachodziacca pad kantrolem Rasii.

Pra toje, što rasijskija vojski pravodziać aktyŭnuju apieracyju ŭ Kurskaj vobłaści, paviedamlali mnohija žurnalisty i vajenkary jak u Rasii, tak i va Ukrainie. U kancy tydnia ŭkrainskija ŚMI, vajenkary i Deep State paviedamili pra toje, što rasijanie zdoleli prasunucca ŭ Kurskaj vobłaści da važnaj trasy zabieśpiačeńnia Sumy—Sudža z uschodu. Heta pastaviła pad pahrozu akružeńnia ŭkrainskija vojski na rasijskaj terytoryi.

Žurnalist i hałoŭny redaktar Cenzar.niet Juryj Butusaŭ napisaŭ 8 sakavika ŭ fejsbuku, što situacyja na kurskim kirunku praciahvaje paharšacca. Pavodle jaho, rasijskija vojski bieśpierapynna nanosiać udary pa ŭsim froncie.

Sa słoŭ Butusava, rasijskija i paŭnočnakarejskija vojski vałodajuć značnaj pieravahaj nad siłami USU, jakija «demanstrujuć ekstraardynarny hieraizm i stojkaść».

Butusaŭ paćvierdziŭ, što Rasija ŭziała pad ščylny ahniavy kantrol šlachi kamunikacyi ukrainskich vajskoŭcaŭ, tamu ciapier utrymlivać pazicyi ŭ Kurskaj vobłaści «ciažej za ŭsio z usich inšych učastkaŭ frontu».

U niadzielu rasijskaje Minabarony taksama apublikavała videa, na jakim, jak śćviardžajecca, rasijskija drony atakujuć aŭtakałonu ŭkrainskich vajskoŭcaŭ, jakija adychodziać, pavodle viersii viedamstva, z zaniataha ŭ žniŭni 2024 hoda horada Sudža.

Anałahičnyja paviedamleńni raniej publikavali rasijskija pravajennyja błohiery, zajaŭlajučy, što napiaredadni rasijskija vajskoŭcy praviali paśpiachovuju apieracyju ŭ Kurskaj vobłaści, terytoryja jakoj častkova zaniataja USU.

Jak śćviardžajuć rasijskija błohiery, u nastupie na Sudžu ŭdzielničajuć śpiecnaz «Achmat», šturmavaja bryhada «Vieterany», bryhada «Uschod» z samaabvieščanaj «DNR» i inšyja padraździaleńni. Kamandzir «Achmata» Apci Ałaŭdzinaŭ u subotu śćviardžaŭ, što «na ŭsich kirunkach Kurskaha ŭčastka frontu ŭsie padraździaleńni pajšli ŭ maštabny nastup».

Sproba prachodu pa hazapravodzie: što viadoma

U subotu ŭviečary Hienštab USU zajaviŭ: «Padraździaleńni desantna-šturmavych vojskaŭ źniščajuć rasijskich śpiecnazaŭcaŭ, jakija pieramiaščalisia pa vietcy hazapravoda ŭ kirunku Sudžy».

Havorka idzie pra mahistralny hazapravod Urenhoj — Pamary — Užharad, jaki prachodzić praz Sudžu i ciapier nie dziejničaje.

Pavodle źviestak ukrainskaha Hienštaba, dyviersijna-šturmavyja hrupy sprabavali zamacavacca ŭ vakolicach Sudžy, ale «ich svoječasova vyjavili», «błakujuć» i «źniščajuć». Sa słoŭ ukrainskich vajskoŭcaŭ, straty rasijan u rajonie Sudžy «vielmi vialikija». Hienštab USU taksama apublikavaŭ videa boju na svajoj staroncy ŭ fejsbuku. Na im vidać źniščeńnie hazapravoda ahniom artyleryi.

U niadzielu źviestki pra sprobu prarvacca pa trubie ŭ svaim telehram-kanale paćvierdziŭ vykanaŭca abaviazkaŭ hubiernatara Kurskaj vobłaści Alaksandr Chinštejn.

«Kab abminuć varožyja drony, miny i techniku, US RF skarystalisia truboj mahistralnaha hazapravoda, pa jakoj raniej haz pastaŭlaŭsia z Rasii praz Ukrainu ŭ Jeŭropu», — napisaŭ Chinštejn.

«Heta byŭ surjozny krok, — dadaŭ Chinštejn. — Mała taho, što ŭ poŭny rost tam nie prajści (a iści, sahnuŭšysia, u abmundziravańni, ź dziasiatak kiłamietraŭ!), ale i isnavała ryzyka atručvańnia, spatrebilisia srodki abarony».

Chinštejn śćviardžaje, što rasijskija vajskoŭcy «viedali ŭsie ryzyki, ale ŭsio roŭna išli i dasiahnuli ŭsich metaŭ». Jakich-niebudź dokazaŭ hetych śćviardžeńniaŭ jon nie pryvioŭ.

Blizki da Minabarony Rasii kanał «Rybaŕ», kamientujučy paviedamleńnie ab prachodzie pa trubie, adznačaje, što «aktyvizacyja bajavych dziejańniaŭ u Kurskaj vobłaści jość» i «pośpiechi jość», ale jany «dajucca ciažkaj canoj».

Inšy pravajenny telehram-kanał «Sieviernyj» napisaŭ, što praź vialikija straty zachod u Sudžu pravaliŭsia. «Hetym razam USU byli hatovyja i našy chłopcy trapili pad niachiłuju razdaču», — havorycca ŭ paviedamleńni.

Ukrainski vajskovy błohier Mirasłaŭ Haj raskazaŭ, što kamandavańnie adnoj z desantna-šturmavych bryhad USU zahadzia atrymała raźvieddanyja ab płanach praciŭnika vykarystoŭvać padziemnyja kamunikacyi mahistralnaha hazapravoda «Prahres».

«Vorah sprabavaŭ dziejničać pa scenary Aŭdziejeŭskaj apieracyi, vykarystoŭvajučy inžyniernyja zbudavańni dla praniknieńnia na padkantrolnuju USU terytoryju», — havorycca ŭ natatcy vajskoŭca. Ź jahonych słoŭ, ukrainskim vajskoŭcam udałosia arhanizavać zasadu kala vychadu z tunelu i raźbić vialikuju hrupu rasijskich vajskoŭcaŭ.

U subotu ranicaj «Ukrainskaja praŭda» sa spasyłkaj na ŭkrainskaha vajskoŭca, jaki znachodzicca ŭ Kurskaj vobłaści, pisała, što 8 sakavika kala 100 rasijskich vajskoŭcaŭ prajšli pa hazapravodzie da pazicyj USU, ale heta «nie było niečakanaściu».

Jon taksama raskazaŭ pra sprobu rasijan nieprykmietna pierakinuć uzdoŭž truby hazapravoda šturmavuju rotu, ale paćvierdziŭ, što ŭkrainskija siły svoječasova vyjavili šturmavikoŭ i spynili ich prasoŭvańnie.

Raźvieddanyja z ZŠA

Niekatoryja krynicy paviedamlajuć, što situacyja ŭ Kurskaj vobłaści dla USU pahoršyłasia ŭ tym liku i z-za straty dostupu Ukrainy da raźvieddanych ZŠA.

Amierykanski časopis Time, spasyłajučysia na piać upłyvovych krynic va Ukrainie i na Zachadzie, napisaŭ, što bolš za ŭsio ad straty raźvieddanych paciarpieli apieracyi mienavita ŭ rajonie Kurska.

«U vyniku hetaj paŭzy zahinuli sotni ŭkraincaŭ», — skazaŭ aŭtaru publikacyi, viadomamu žurnalistu Sajmanu Šusteru, adzin z ukrainskich aficeraŭ.

Hety čałaviek dadaŭ, što «samaja vialikaja prablema — heta maralny duch, adnak rašeńnie Vašynhtona spynić abmien raźvieddanymi daje supierniku pieravahu na froncie».

Krynica Šustera va ŭradzie Ukrainy adznačaje, što USU adčuvajuć prablemy «nie tolki ŭ Kurskaj vobłaści, ale i na ŭsioj rasijskaj terytoryi», bo ŭkrainskija vajskoŭcy stracili mahčymaść zahadzia zasiakać nabližeńnie rasijskaj avijacyi.

Heta ŭpłyvaje nie tolki na situacyju na froncie, ale i na zdolnaść Ukrainy adbivać pavietranyja ŭdary Rasii pa haradach krainy, skazana ŭ publikacyi.

• 1
• 1
• 3
• 2
• 2
• 15
• 5
• 0