Znajšoŭsia hurt, jaki płanuje sabrać «Minsk-Arenu» čatyry razy zapar. I ŭžo amal zrabiŭ heta

Rasijski hurt «Ruki vvierch», jaki byŭ šalona papularny ŭ dzievianostyja, źbirajecca pabić rekord ANNA ASTI. Raniej tolki ŭ hetaj ukrainskaj śpiavački z rasijskim pašpartam atrymlivałasia trojčy zapar sabrać «Minsk-Arenu».

Kvitki na kancerty «Ruki vvierch» 30 i 31 maja ŭžo całkam raspradadzienyja. Na kancert, jaki adbudziecca 2 červienia, taksama amal usio raskupili: zastałosia kala sotni kvitkoŭ.

Padčas spartyŭnych mierapryjemstvaŭ «Minsk-Arena» źmiaščaje na trybunach 15086 čałaviek. Na kancertach situacyja trochi źmianiajecca — na miescy, jakija znachodziacca za scenaj, kvitki nie pradajucca, zatoje dadajecca tancpoł. Adnak ličycca, što ŭ vyniku trapić na kancert mohuć plus-minus tyja ž 15 tysiač čałaviek.

Takim čynam, na «Ruki vvierch» užo pradadziena amal 45 tysiač kvitkoŭ.

«My znoŭ padorym vam ramantyku sustreč, dzie jon ciabie całuje i kaža, što kachaje, dzie student cacku novuju znajšoŭ, a pa šyrokaj ściežcy praskakali kaŭboi. 18 vam užo, a značyć, možna adarvacca nie pa-dziciačy pad lubimyja chity», — pišuć u rekłamie.

Pabačyŭšy šalony popyt, arhanizatary terminova dadali jašče adzin kancert — 3 červienia. Kaštujuć kvitki niatanna: ad 90 da 297 rubloŭ, ale heta biełarusaŭ nie spyniaje. Navat samyja darahija pakupajuć vielmi aktyŭna.

Pavialičyć

Nahadajem: z samaha pačatku poŭnamaštabnaj vajny va Ukrainie Siarhiej Žukaŭ, salist hurta «Ruki vvierch», abraŭ pazicyju «ja pa-za palitykaj».

U sakaviku 2022 hoda artyst apublikavaŭ u svaim instahramie post pra vajnu z pasyłam «nie ŭsio tak adnaznačna»: «Ja, jak i ŭsie vy, hladžu za tym, što adbyvajecca. I baču i viedaju toje samaje, što i vy. Ja nie palityk, nie žurnalist, nie palitołah. Ja — muzyka. Tak, u mianie vialikaja aŭdytoryja, ale heta tym bolš aznačaje vialikuju adkaznaść. Za kožnaje majo słova. Ciapier stolki valicca infarmacyi, z usich bakoŭ, što prosta brać i raspaŭsiudžvać jaje, nie majučy mahčymaści pravieryć, — ja tak nie budu rabić… Adčuvańnie, što ŭsie adno adnaho nienavidziać. Chejt, abrazy, nianaviść. Tak nielha! Nu my ž usio ŭ pieršuju čarhu ludzi! Spyniciesia, nu praŭda!».

Bolš za ŭsio tady Siarhieju było škada rasijskich paralimpijcaŭ, jakich adchilili ad udziełu ŭ mižnarodnych spabornictvach.

Adnak usiaho praź niekalki tydniaŭ hramadzianskaja pazicyja Siarhieja Žukava stała vidavočnaj. Jon vystupiŭ u Łužnikach na kancercie ŭ honar akupacyi Kryma.

Potym Siarhiej Žukaŭ trapiŭ u skandał praz toje, što ŭ jaho bar «Ruki vvierch» u Krasnadary nie puścili čałavieka ŭ kamuflažy, jaki nazyvaŭ siabie ŭdzielnikam vajny. Artyst publična vybačyŭsia i zajaviŭ, što ŭ jaho bary «abaroncam ajčyny zaŭsiody rady».

• 2
• 5
• 1
• 39
• 2
• 0
• 7
• 0