«Pryjechała, kab šeść hadzin pahladzieć televizar». Biełarusku sa statusam uciekača nie puścili va Ukrainu bieź vizy
Biełaruskaja aktyvistka sprabavała trapić va Ukrainu, majučy na rukach treveł-dakumient i pastajanny dazvoł na žycharstva ŭ Čechii, ale jaje raźviarnuli.
Miesiac dziaŭčyna płanavała pajezdku ŭ Lvoŭ, kudy jaje zaprasili na haradskoje mierapryjemstva. Aktyvistka pavinna była pradstaŭlać na im biełaruskuju moładź.
Kab pierakanacca, što jaje prapuściać na miažy, biełaruska pisała va ŭkrainskuju ambasadu ŭ Čechii: tam joj skazali, što vizy nie vydajuć i što dastatkova budzie treveł-dakumienta i dazvołu na pastajannaje pražyvańnie. Jaje praterminavany biełaruski pašpart znachodziŭsia ŭ češskich čynoŭnikaŭ.
3 krasavika dziaŭčyna pierajšła miažu Polščy i sieła ŭ ciahnik, jaki nakiroŭvaŭsia da Ukrainy. Pravadnica, jakaja pavinna była pravieryć dakumienty, zbłytała češski treveł-dakumient z realnym pašpartam i prapuściła biełarusku biez dadatkovych pytańniaŭ.
Užo ŭ ciahniku, padčas pravierki ad pamiežnaj słužby Ukrainy, vyśvietliłasia, što aktyvistcy patrebna viza. Jaje pieraviali ŭ inšy vahon, dzie «byŭ ceły natoŭp pamiežnikaŭ». Jany spytali, čamu dziaŭčyna dumaje, što joj nie patrebna viza.
«Ja pačała pryvodzić arhumient, što ja pisała ŭ ambasadu, dzie mnie adkazali, što prablem z ujezdam nie budzie. Adnak tolki ŭ vahonie ciahnika na terytoryi Ukrainy mnie patłumačyli, što pavinien być nie češski, a ŭkrainski dazvoł na pastajannaje pražyvańnie, kab nie było prablem z ujezdam», — raskazała jana «Našaj Nivie».
Pamiežniki taksama źviazali heta z tym, što ŭ treveł-dakumiencie ŭ poli dla hramadzianstva ŭ dziaŭčyny było napisana «biežanka» i tolki ŭ nacyjanalnaści — «biełaruska». Pry hetym u admovie va ŭjeździe paznačyli jaje hramadzianstva — «Biełaruś».
«Jany skazali, što kali b u mianie byŭ biełaruski pašpart, to biez prablem by puścili», — uzhadvaje dziaŭčyna.
Kali ciahnik spyniŭsia ŭ Lvovie, biełarusku adviali ŭ zakrytaje pamiaškańnie na vakzale — tam jana šeść hadzin čakała, pakul možna budzie źjechać nazad. Pravadnica ciahnika, jakaja pierabłytała pašparty, budzie pavinna zapłacić štraf.
Usie šeść hadzin čakańnia ŭkrainskija pamiežniki vietliva razmaŭlali ź biełaruskaj i pytali, ci nie treba joj papić ci pajeści.
«My nastolki dušeŭna razmaŭlali pra toje, što adbyvajecca va Ukrainie, u Biełarusi. My zrazumieli adno adnaho. I nastolki zastałosia stanoŭčaje ŭražańnie ad pajezdki, niahledziačy na hety kanfuz, jaki vyjšaŭ, što ja b źjeździła jašče raz bieź vizy. Prosta tamu što my kłasna praviali čas razam», — kaža jana.
U pakoi, dzie siadzieła aktyvistka, televizar pastajanna pakazvaŭ naviny. Pa kanałach krucili ahitacyju iści ŭ vojska, a reparciory raskazvali ab tym, kudy patrapili rakiety. Niekalki razoŭ prahučała pavietranaja tryvoha — ludzi nie reahavali na jaje ni ŭ pamiaškańni, ni na vulicy.
«Ale kali tak acanić situacyju, to ja prosta pryjechała ŭ Lvoŭ, kab šeść hadzin pahladzieć televizar u zakrytaj prastory i źjechać dadomu».
Ciapier čytajuć
Muž Siamaški byŭ nie adzinym, chto atrymaŭ pašpart prykryćcia 13 lutaha 2018 hoda39
Kamientary