«Palityčny kryzis u Hruzii ŭdaryŭ i pa biełarusach. Mnohija ź ich nie bačać pierśpiektyŭ doŭhaterminovaj lehalizacyi, pradajuć nabytyja tut kvatery i pierajazdžajuć u inšyja krainy», — tak prakamientavaŭ «Pozirku» brescki pravaabaronca Raman Kiślak, jaki pražyvaje ŭ Hruzii, źnižeńnie kolkaści suajčyńnikaŭ u krainie, jakoje nazirałasia apošnija dva hady, 2023-y i 2024-y.
«2021-y i 2022-y byli hadami najbolš masavaha pryjezdu biełarusaŭ u Hruziju, — adznačyŭ Kiślak. — U 2021-m na fonie represij u Biełarusi, asabliva ŭ dačynieńni da ŚMI i hramadskich arhanizacyj, było mała alternatyŭ dla vyjezdu. Miežy byli amal na zamku: nieba zakryła Jeŭropa, naziemnuju miažu — Łukašenka. U 2022 hodzie pačałosia poŭnamaštabnaje ŭvarvańnie Rasii va Ukrainu, i heta ŭzmacniła płyń tych, chto vyjazdžaje».
Pavodle jaho słoŭ, na źmianšeńnie kolkaści biełarusaŭ, jakija zastajucca ŭ Hruzii, upłyvaje pierš za ŭsio niemahčymaść doŭhaterminovaj lehalizacyi: ukaz 278 ad 4 vieraśnia 2023 hoda (niemahčymaść abmianiać praterminavany pašpart u zamiežnych ustanovach), admovy biełarusam u prytułku i va ŭjeździe pry vizaranie (abnuleńnie terminu znachodžańnia, jaki nie moža pieravyšać adnaho hoda, šlacham karotkaterminovaha vyjezdu za miažu), vielmi słabyja pierśpiektyvy atrymańnia hramadzianstva Hruzii.
Ciapier hruzinski parłamient, kudy admoviłasia ŭvajści apazicyja, jakaja abvinavaciła kirujučuju partyju «Hruzinskaja mara» ŭ falsifikacyi vybaraŭ u kastryčniku 2024 hoda, razhladaje prajekt novaha mihracyjnaha zakanadaŭstva.
Jon praduhledžvaje palahčeńnie pracedury departacyi, uskładnieńnie pracedury padačy dakumientaŭ na mižnarodnuju abaronu, jakuju i biez taho dahetul nie atrymaŭ ni adzin hramadzianin Biełarusi, jaki padaŭsia na jaje. Ułady nie chavajuć, što papraŭki źviazanyja z udziełam zamiežnikaŭ u akcyjach pratestu suprać jaje palityki, pierš za ŭsio adychodu ad jeŭrapiejskaj intehracyi.
Pravaabaronca paviedamiŭ, što 18 krasavika pradstaŭniki dyjaspary sustrelisia z supracoŭnikami pravavoha departamienta ŭpraŭleńnia Viarchoŭnaha kamisara AAN pa spravach uciekačoŭ u Hruzii. «My raspaviali pra ŭsie składanaści, ź jakimi sutykajucca biełarusy pry padačy na prytułak i abskardžańni admoŭ u mižnarodnaj abaronie. Damovilisia, što budziem infarmavać ab situacyi z pravam na prytułak u dačynieńni da biełarusaŭ u Hruzii», — skazaŭ Kiślak.
Ciapier čytajuć
Budučy kredyt pad 1% na novabudoŭli abrastaje padrabiaznaściami. Jak źmienicca rynak nieruchomaści?3
Budučy kredyt pad 1% na novabudoŭli abrastaje padrabiaznaściami. Jak źmienicca rynak nieruchomaści?
I pra realnych bandytaŭ, i pra kryvarukaha Kościu-plitačnika, i pra seks u ciahniku. Žurnalistka z Homiela napisała knihu — čytać jaje strašna i śmiešna1111
Kamientary