Daviedalisia, jak spravy ŭ Ryhora Kastusiova — jość dobryja naviny
Ryhor Kastusieŭ, były staršynia BNF, vyjšaŭ na volu minułym letam. Za 2024 hod jon pieražyŭ try apieracyi pa ankałahičnaj chvarobie. Siabry palityka raskazali «Našaj Nivie», jak jon siabie adčuvaje.
Jak nam raskazali, Ryhor nie adnojčy zhadvaŭ, što ŭ paraŭnańni z apošnim hodam pierad vyzvaleńniem ciapier adčuvaje siabie vielmi dobra. Dapamahli i niekalki apieracyj, apošnija ź jakich prajšli ŭ listapadzie i śniežni 2024 hoda, i lačeńnie ŭ sanatoryi.
Apošnija siem miesiacaŭ Kastusioŭ znachodzicca pad nahladam daktaroŭ. Kažuć, što pretenzij da ich niama — maŭlaŭ, starajucca rabić usio mahčymaje.
Niadaŭna Ryhor byŭ na kansultacyi ŭ Baraŭlanach, praz paru tydniaŭ daviadziecca tudy viartacca sa zroblenym u Škłovie UHD. Praviaduć abśledavańnie, pa jaho vynikach, mahčyma, spatrebicca jašče adna apieracyja, ale pakul heta jašče pad pytańniem.
Jak śviedčać daktary, «pa vynikach lačeńnia prykmiety ankałohii nie nazirajucca».
Ryhora Kastusiova aryštavali 12 krasavika 2021 hoda. Palityku prysudzili 10 hadoŭ źniavoleńnia pa abvinavačvańni ŭ «zmovie z metaj zachopu ŭłady niekanstytucyjnym šlacham» (art. 357 KK). 3 lipienia 2024 hoda Kastusioŭ vyjšaŭ na volu pa pamiłavańni.
Za kratami ŭ mužčyny znajšli ankałahičnuju chvarobu. Niahledziačy na heta, jamu ŭzmacnili pakarańnie — źmiaścili jaho ŭ pamiaškańnie kamiernaha typu, a paźniej i ŭ krytuju turmu. U krasaviku 2024-ha, kali Kastusioŭ jašče byŭ za kratami, jamu zrabili apieracyju. Paśla vyzvaleńnia, u listapadzie i śniežni 2024-ha, daviałosia pieražyć jašče dźvie apieracyi.
«Naša Niva» — bastyjon biełaruščyny
PADTRYMAĆ
Načalnik milicyi Brahina stralaŭ u svaju žonku. Jana cudam vyžyła9
Kamientary