Nastajaciel manastyra Šaaliń trapiŭ pad śledstva pa padazreńni ŭ rastratach i amaralnym ładzie žyćcia
Kitajski budyjski manastyr Šaaliń, prasłaŭleny ŭ hankonhskich i amierykanskich bajevikach jak miesca naradžeńnia bajavoha mastactva kunh-fu, abviaściŭ, što ŭ dačynieńni da jaho nastajaciela Šy Junsinia raspačata śledstva pa abvinavačańni ŭ rastracie i amaralnych pavodzinach, piša Bi-bi-si.
U zajavie, apublikavanaj u niadzielu ŭ sacyjalnaj sietcy WeChat, manastyr paviedamiŭ, što spravu Šy Junsinia rasśledujuć niekalki viedamstvaŭ, i što jaho abvinavačvajuć u prysvajeńni i rastracie srodkaŭ manastyra i hrošaj, vydzielenych na peŭnyja prajekty, a taksama ŭ tym, što nasupierak zapaviedziam budyzmu jon žyŭ z mnostvam žančyn i zavioŭ ź imi pazašlubnych dziaciej.
U paniadziełak z ranicy naviny pra aryšt Šy stali samaj papularnaj temaj u kitajskaj sietcy Weibo, ale čutki pra heta pačali raspaŭsiudžvacca jašče na vychodnych. U samoha Šy ŭ Weibo — 880 000 padpisčykaŭ, i na jaho staroncy štodnia źjaŭlalisia abnaŭleńni ŭ vyhladzie budyjskich nastaŭleńniaŭ, ale paśla 24 lipienia abnaŭleńni raptam spynilisia.
Šaaoliń — manastyr z 1500-hadovaj historyjaj — ličycca adnoj z kałysak bajavoha mastactva kunh-fu (ušu), a taksama miescam naradžeńnia dzen-budyzmu. Jon znachodzicca ŭ harach u centralnym Kitai, u pravincyi Chenań. U Šaaliń štohod pryjazdžajuć tysiačy novych pasłušnikaŭ z usiaho Kitaja i inšych krain.
Šy Junsiń byŭ manacham Šaalinia z 1982 hoda, a kiraŭnikom manastyra staŭ u 1999 hodzie. Mienavita jon zdoleŭ pieraŭtvaryć słavu Šaalinia ŭ kamiercyjny pośpiech: pry im była stvorana trupa manachaŭ, što vystupajuć pa ŭsim śviecie z kunh-fu-šou, pry im ža manastyr pačaŭ adkryvać škoły za miežami Kitaja, a taksama zasnavaŭ dziasiatki firm pa ŭsim śviecie.
Dziesiać hadoŭ tamu Šy ŭžo abvinavačvaŭsia ŭ tych ža samych złačynstvach, što i ciapier: rastracie i pazašlubnych dzieciach, a taksama ŭ atrymańni darahich padarunkaŭ ad firmaŭ i miascovych uładaŭ, u tym liku ŭsiodarožnika Volkswagen i mantyi, vyšytaj zołatam.
Ale tady ŭsie abvinavačvańni ź jaho byli źniaty. U intervju Kitajskaj słužbie Bi-bi-si ŭ 2015 hodzie Šy na pytańnie pra tyja abvinavačvańni adkazaŭ: «Kali b prablema isnavała, jana daŭno b uspłyła».
Šy Junsiń źjaŭlajecca kiraŭnikom budyjskaj asacyjacyi Chenania i namieśnikam kiraŭnika budyjskaj asacyjacyi Kitaja, a ŭ pačatku stahodździa jon byŭ deputatam Usiekitajskaha schodu narodnych pradstaŭnikoŭ.
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary