Рэдактара сайта «Віртуальны Брэст» пакаралі «за распаўсюд экстрэмісцкага матэрыялу»
Два месяцы таму — 16 чэрвеня — у судзе Маскоўскага раёна Брэста ўжо разглядалася адміністрацыйная справа ГУБАЗіК МУС па Брэсцкай вобласці аб прызнанні інфармацыйнай прадукцыі сайта «Виртуальный Брест» экстрэмісцкім матэрыялам, паведамляе БАЖ.
Падставай для судовага працэсу ў чэрвені была публікацыя пра гісторыю затрымання жыхара Баранавічаў Уладзіміра Гундара. У якасці ілюстрацыі да тэксту на сайце змясцілі фотаздымак Гундара ў вопратцы з элементамі арнаменту, дзе на каўняры прысутнічала свастыка.
Прадстаўнікі ГУБАЗіК заявілі, што гэты арнамент утрымлівае свастыку і прапанавалі суду прызнаць згаданую публікацыю «экстрэмісцкім матэрыялам».
Тады суд задаволіў пазоў і прызнаў публікацыю экстрэмісцкай, але на гэтым прыгоды для рэдактара «Виртуального Бреста» Андрэя Кухарчыка не скончыліся. Праз некалькі тыдняў на яго склалі новы адміністрацыйны пратакол: гэтым разам паводле ч. 2 арт. 19.11 КаАП РБ — за «распаўсюд інфармацыйнай прадукцыі, змешчанай у рэспубліканскі спіс экстрэмісцкіх матэрыялаў». Справа зноў тычылася публікацыі, у якой быў змешчаны фотаздымак Уладзіміра Гундара.
Пратакол некалькі разоў вярталі ў міліцыю на дапрацоўку, пакуль 19 жніўня суд Маскоўскага раёна Брэста не прызнаў Андрэя Кухарчыка вінаватым.
Суд пакараў рэдактара «Виртуального Бреста» штрафам памерам 10 базавых велічынь (290 рублёў) і пастанавіў канфіскаваць у яго камп’ютарнае абсталяванне, на якім ён, паводле абвінавачання, здейсніў правапарушэнне, распаўсюдзіўшы фотаздымак.
Але, як адзначыў Андрэй Кухарчык, гэтую тэхніку ў яго забралі яшчэ ў ліпені падчас ператрусу і пакуль нічога не вярнулі.
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?4
Каментары