Гэтае рэчыва дакладна ёсць у вас дома. Але наўрад ці вы ведалі, наколькі яно каштоўнае
Харчовая сода ёсць у кожным доме, але мала хто ведае, наколькі карыснай яна можа быць у медыцыне і касметалогіі. Дзелімся незвычайнымі рэцэптамі.
Харчовая сода (ці гідракарбанат натрыю) — гэта неарганічнае хімічнае злучэнне, крышталічны парашок, здольны паглынаць ваду. Соду выкарыстоўваюць у касметыцы, прадуктах харчавання, некаторых леках.
Сода мае безліч карысных для арганізма характарыстык. Сярод іх — супрацьмікробныя і супрацьзапаленчыя ўласцівасці, здольнасць нейтралізоўваць кіслату.
Сода — цалкам біяраскладальнае рэчыва, а значыць, яно абсалютна экалагічна чыстае.
Сода: інструкцыя па прымяненні
У хатніх умовах соду можна выкарыстоўваць у розных формах: сухі парашок, паста ці раствор. У выпадку са свербам і сыпам на скуры змяшайце соду з вадой, каб атрымалася густая паста, і нанясіце непасрэдна на месца раздражнення. Каб узмацніць карыснае дзеянне соды, дадайце некалькі кропляў настою календулы ці соку алоэ вера.
Гэтая ж паста дапаможа ў выпадку з дэрматытам у груднога дзіцяці. Трэба проста нанесці яе на месца запалення, пачакаць, пакуль паста высахне, і змыць яе вадой.
Калі трэба аблегчыць наступствы апёкаў, намачыце тканіну ў растворы соды і пакладзіце яе на месца апёку. Яшчэ ў гэтай сітуацыі можна прыняць ванну з ¼ стакана харчовай соды і з паловай стакана кукурузнай мукі. Такая ванна дапаможа знізіць раздражненне на скуры.
Сода можа стаць добрым дадаткам пры лячэнні грыбка і прышчоў. Можна змяшаць соду з маслам чайнага дрэва, каб палепшыць яе эфектыўнасць, і кропкава наносіць гэтую сумесь на месцы запаленняў.
Калі адчуваеце боль ці цяжар у страўніку пасля ўжывання вялікай колькасці ежы ці алкаголю, сода таксама можа дапамагчы. Развядзіце чайную лыжку соды ў стакане вады, дадайце некалькі кропляў лімоннага соку і выпіце. Іншы варыянт лячэння гэтай жа праблемы — дробка соды на кубак мятнай гарбаты.
Чайная лыжка соды на стакан вады таксама дапаможа пазбавіцца ад запора.
Сода ў касметыцы і падчас прастуды
Калі баліць горла, варта паласкаць яго двойчы на дзень растворам з соды і цёплай вады. Таксама паспрабуйце пры прастудзе інгаляцыі з содай, для гэтага вазьміце сталовую лыжку соды на літр кіпню. Такая інгаляцыя павінна доўжыцца 10 хвілін, а рабіць яе варта двойчы на дзень. Гэта дапаможа знізіць раздражненне слізістай горла і палегчыць дыханне.
Інгаляцыі з содай таксама маглі б быць карыснымі для хворых на мукавісцыдоз, але ў гэтым выпадку трэба пракансультавацца пра такое лячэнне з доктарам.
Калі хочаце зрабіць валасы больш мяккімі, сода і тут дапаможа. Растварыце чайную лыжку соды ў шампуні для валасоў, нанясіце сумесь на галаву і масіруйце скуру галавы тры хвіліны. Потым змыйце сумесь з валасоў — яны будуць больш чыстымі і мяккімі.
Нарэшце, харчовая сода — цудоўны сродак для тых, хто пакутуе праз дрэнны пах з рота. Змяшайце соду з вадкасцю для паласкання рота, і вы здолееце пазбавіцца гэтай далікатнай праблемы.
Ці можа сода нашкодзіць?
Лепей за ўсё выбіраць найменшую эфектыўную дазіроўку соды для ўжывання. Калі ж гэтага рэчыва будзе занадта шмат, вы можаце сутыкнуцца з непрыемнымі наступствамі, такімі як млоснасць, галаўны боль, раздражняльнасць, слабасць у мускулах і ацёк ступняў.
Не трэба прымаць соду даўжэй за два тыдні.
А вось спіс фактараў, людзям з якімі дакладна супрацьпаказанае тэрапеўтычнае ўжыванне соды: прыём сардэчных прэпаратаў ці антацыдаў, павышаны ўзровень натрыю ў сыроватцы крыві, ныркавая недастатковасць і рэспіраторны алкалоз.
Каментары