Ёсць узятыя ў палон расіяне, ёсць збіты верталёт.
Баі на мяжы Сумскай вобласці Украіны і Курскай вобласці Расіі пачаліся 6 жніўня. Прычым менавіта на расійскай тэрыторыі.
Афіцыйных каментарыяў з боку Украіны не было, а вось Расія заявіла, што атака ўкраінскіх дыверсійных груп пачалася а 8-й раніцы. У ёй нібыта прымала ўдзел каля 300 байцоў 22-й механізаванай брыгады УСУ, якіх падтрымлівалі 11 танкаў і звыш 20 баявых браніраваных машын.
Як заведзена ў такіх выпадках, Міністэрства абароны Расіі адразу абвясціла, што атака была адбітая, дзясяткі ўкраінцаў былі забітыя, а іх тэхніка знішчаная.
Аднак не ўсё так проста. На працягу дня паступалі паведамленні аб баях ля населеных пунктаў Суджа, Коранева, Нікалаева-Дар'іна, Дар'іна, Свердлікава, Гаголеўка, Ганчароўка, Курылаўка, Горналь. Таксама згадваўся населены пункт Крупец, які знаходзіцца на дарозе ад Глухава ў Сумскай вобласці ў Курск.
Z-блогеры прызнаюць страты расійскага боку як у тэхніцы, так і ў авіяцыі. На жаль, праверыць гэтыя паведамленні пакуль немагчыма.
Украінскія каналы тым часам сталі публікаваць відэа з палоннымі, расійскія каналы рэпосцілі іх і пацвярджалі, што агучаныя імёны рэальныя, гэтыя людзі насамрэч служылі пад Курскам.
З'явілася і непацверджанае відэа таго, як шасцярых палонных расіян некуды вядуць.
Тэлеграм-канал «Тіпічный Курск» вечарам паведаміў аб актыўных баявых дзеяннях і ахарактарызаваў сітуацыю як «вельмі цяжкую». У тэлеграм-канале «Суджа родная» з'яўляюцца паведамленні аб ракетнай небяспецы.
Увечары з'явілася інфармацыя пра расійскі верталёт Ка-52, збіты непадалёку ад месца баёў. 22-гадовы пілот загінуў, другі паранены. Расійскія каналы прызналі яго смерць.
Блогер Юрый Падаляка ў сваім пабліку напісаў, што ў баях удзельнічаюць «мінімум пяць цяжкіх брыгад» УСУ, былі заўважаны амерыканскія «Брэдлі». 22-ю механізаваную брыгаду ён характарызуе як элітную, што сведчыць аб сур'ёзных намерах украінскага боку.
«Адной разведкай боем тут не абыдзецца. У бліжэйшыя дні тут разгорнуцца вельмі моцныя баі», — лічыць Падаляка.
Цяпер чытаюць
Новая аблава: затрымалі дзясяткі сваякоў палітвязняў і тых, хто ім дапамагаў — што вядома64
Каментары