Расійскага хлопца, якога за спалены Каран збіў сын Кадырава, абвінавацілі і ў дзяржздрадзе
У дачыненні да Мікіты Жураўля, асуджанага за спаленне Карана, распачатая крымінальная справа аб дзяржаўнай здрадзе. Пракуратура Валгаградскай вобласці ўжо зацвердзіла абвінаваўчае заключэнне, піша Медуза.
Паводле версіі следства, Журавель праз неназваны месенджар «ініцыятыўна прапанаваў супрацоўніцтва прадстаўніку службы бяспекі Украіны» ў сакавіку 2023 года, як сцвярджае пракуратура, ён адправіў яму відэазапісы чыгуначнага саставу, які перавозіў ваенную тэхніку расійскіх узброеных сіл і самалёты ваеннага прызначэння. Акрамя таго, Жураўля абвінавачваюць у тым, што ён перадаў звесткі аб перамяшчэнні службовага аўтамабіля адной з вайсковых частак.
Крымінальную справу накіравалі ў Валгаградскі абласны суд для разгляду па сутнасці.
Мікіту Жураўля затрымалі ў маі 2023 года. Па версіі следства, ён па заданні ўкраінскіх спецслужбаў спаліў Каран на фоне саборнай мячэці ў Валгаградзе, пасля чаго перадаў відэазапіс сваіх дзеянняў супрацоўніку СБУ. Расследаванне справы амаль адразу перадалі ў Чачню. Тады ж Жураўля этапавалі ў СІЗА Грознага.
Пазней стала вядома, што ў СІЗА Грознага Жураўля збіў сын кіраўніка Чачні Адам Кадыраў. Пазней Рамзан Кадыраў пацвердзіў гэтую інфармацыю. Ён таксама апублікаваў відэа, на якім яго 15-гадовы сын збівае Жураўля.
У канцы лютага 2024 года Вісаітаўскі суд Грознага прысудзіў Мікіту да трох з паловай гадоў пазбаўлення волі. 20-гадовага Жураўля прызналі вінаватым па артыкулах аб абразе пачуццяў вернікаў (Частка 2 артыкула 148 КК) і аб хуліганстве па матывах рэлігійнай нянавісці (Частка 2 артыкула 213 КК). Журавель прызнаў віну па першым абвінавачванні, але адмаўляў па другім.
Зяленскі назваў, якія рэтранслятары на мяжы і беларускія прадпрыемствы хвалююць Украіну36
Каментары