«Толькі элементы славянскага паходжання». У Брэсце таксама забаранілі Санта-Клауса, сані, аленяў і папулярныя хіты
Брэсцкія чыноўнікі выпусцілі прадпісанні па афармленні гандлёвых і забаўляльных аб'ектаў. У няміласць трапіў нават Санта-Клаус, піша BGmedia.
Брэсцкі гарвыканкам накіраваў прадпісанні ва ўстановы гандлю і грамадскага харчавання з нагоды навагодніх упрыгожванняў.
У дэкоры ўстаноў цяпер вітаюцца выключна «элементы славянскага паходжання», якія «не супярэчаць гістарычным, культурным і духоўным традыцыям беларускага народа». Аналагічныя рэкамендацыі раней паступілі і ва ўстановы Мінска.
«У мэтах забеспячэння адзінага падыходу да выкарыстання традыцыйных навагодніх і калядных вобразаў» і «прасоўвання беларускай культуры і традыцый» мясцовыя ўлады рэкамендуюць выключыць выкарыстанне элементаў і вобразаў, не ўласцівых беларускім нацыянальным традыцыям.
Супрацоўніца адной з крамаў на ўмовах ананімнасці расказала пра тое, як яна мела зносіны з чыноўнікам упраўлення ідэалогіі гарвыканкама.
«Я патэлефанавала, каб удакладніць некаторыя дэталі. Усё ж з ліста не зусім ясна, каго можна цяпер ставіць у якасці ўпрыгожвання залы, каго нельга — ну, каб у нас потым не было праблем. З размовы я зразумела, што Дзед Мароз і Снягурка — так, а вось Санта Клаус ужо пад забаронай. Нават сані і алені, на якіх ён ездзіць, могуць выклікаць падазрэнне.
Спачатку я думала, што гэта жарт. Але ўсё пацвердзілася пару дзён праз, калі нас сабралі ўжо ва ўпраўленні гандлю і патлумачылі дакладна так, як мне казаў ідэолаг», — расказала супрацоўніца.
Цяпер работнікі кавярняў і крамаў Берасця вымушаныя ламаць галовы над тым, як, з аднаго боку, не падмануць чаканні наведвальнікаў, а з другога — не трапіць у няёмкае становішча, калі раптам да іх наляціць праверка з выканкама і ўбачыць у дэкоры нейкую неадпаведнасць новым патрабаванням.
«Праблема ж яшчэ і ў тым, што мы заказваем фігуркі казачных персанажаў у Кітаі, паколькі ў Беларусі іх не вырабляюць. Кітайцы робяць так, што не заўсёды адразу адрозніш, дзе Санта, а дзе наш Дзед Мароз: ёсць там барада, няма барады. Ды, уласна кажучы, няма паміж імі ніякай асаблівай розніцы.
Новы год, Каляды — гэта ж сусветныя святы, іх нават у Індыі і ў Японіі адзначаюць. І мы заўсёды ўпрыгожвалі так, каб было цікава і маляўніча. А тут нейкія за вушы прыцягнутыя правілы», — адзначыла работніца гандлю.
Ідэолагі таксама сфарміравалі плэйліст для фонавай музыкі ў гандлёвых цэнтрах і ўстановах. У ім пазначаныя песні як сучасных айчынных і расійскіх выканаўцаў, так і савецкія кампазіцыі — у выкананні «Песняроў», «Верасоў», Валянціны Талкуновай, Вікторыі Алешкі, Анастасіі Краўчанкі і іншых. А вось папулярныя калядныя мелодыі замежных выканаўцаў рэкамендавана выключыць, у крайнім выпадку звесці да мінімуму.
«У нас на карпаратывах вельмі часта кліенты просяць паставіць ABBA Happy New Year або Hark The Herald Angels Sing, I'm Dreaming of a White Christmas і іншыя сусветныя хіты. Але мне ўжо начальства сказала гэтым не захапляцца. Маўляў, калі ўжо вельмі просяць, уключы, але разава.
А прыярытэт павінен аддавацца кампазіцыям тыпу «Белы снег» у выкананні Таісіі Павалій або «Снег кружится» ў выкананні «Самацветаў», «Новогодние игрушки» і да т. п. — ну, увогуле, абы на рускай мове. Дарэчы, на ўкраінскай таксама нельга. У мяне праз гэта ўжо былі праблемы», — расказаў дыджэй аднаго з рэстаранаў Брэста.
Новыя рэкамендацыі закранулі і школы з дзіцячымі садкамі. Напрыклад, у адной са школ у снежні дзеці па традыцыі рабілі калядныя вянкі з хвойных галінак, але цяпер і такія вянкі прызналі «элементамі чужой нам культуры».
У мінскіх гандлёвых цэнтрах і кавярнях цяпер не будуць уключаць сусветныя навагоднія хіты. Затое даюць зарабіць праўладным артыстам
Мінскія ўлады прадпісваюць упрыгожваць навагоднія вітрыны толькі «элементамі славянскага паходжання»
Смешны выпадак у «Мінск-Свет»: нейкі маладзён сцягнуў калядны вянок, але разлічыўся за гэта 10 рублямі
«Размаўляў увесь час па-беларуску». Павел Севярынец запісаў свой першы зварот пасля вызвалення18
Каментары