Моцныя снегапады паралізавалі Еўропу — заторы, адмены рэйсаў і цягнікоў, закрыццё школ
У апошнія дні Еўропа змагаецца з суровымі зімовымі ўмовамі надвор’я.
Экстрэмальна нізкія тэмпературы і моцныя снегапады прывялі да адмены авіярэйсаў і цягнікоў, утварэння затораў на дарогах, а таксама закрыцця школ у многіх краінах, піша Bild.
Асабліва моцна пацярпелі Нідэрланды: з-за надвор’я і тэхнічных няспраўнасцяў чыгуначнае злучэнне было амаль цалкам паралізаванае. У амстэрдамскім аэрапорце Схіпхол — важным міжнародным транспартным вузле — учора давялося адмяніць амаль 700 рэйсаў, што складае больш за палову з прыблізна 1200 запланаваных узлётаў і пасадак.
У парыжскіх аэрапортах Шарль-дэ-Голь і Арлі авіякампаніі былі вымушаныя адмяніць 15 % сваіх рэйсаў. У Вялікабрытаніі таксама адмянялі рэйсы ў некалькіх аэрапортах.
Францыю ахапілі заторы агульнай працягласцю каля 1000 кіламетраў — у Нармандыі, Брэтані і вакол Парыжа. У Нармандыі ў выніку ДТЗ, звязаных з неспрыяльнымі ўмовамі надвор’я, загінулі як мінімум пяць чалавек.
Снег і мароз запаволілі рух і высакахуткасных цягнікоў: французскі TGV быў вымушаны знізіць хуткасць з 300 да 200 км/г. У Парыжы было прыпынена аўтобуснае злучэнне, а таксама рух на некаторых трамвайных лініях.
У Вялікабрытаніі былі зачыненыя сотні школ: толькі ў Паўночнай Ірландыі, паводле даных уладаў, спынілі працу 212 устаноў. Англія, Шатландыя і Уэльс таксама пацярпелі ад масавага закрыцця навучальных устаноў.
Акрамя таго, кампанія Eurostar, чые цягнікі злучаюць Вялікабрытанію з мацерыковай Еўропай, параіла пасажырам на маршрутах паміж Лонданам і Нідэрландамі адкласці паездкі. З-за дрэнных умоў надвор’я ў Нідэрландах цягнікі маглі курсіраваць толькі да Бруселя.
Нават на Балеарскіх астравах у Іспаніі назіраўся моцны снегапад: на Маёрцы і ў большасці іншых рэгіёнаў улады абвясцілі трэці па ўзроўні небяспекі — жоўты — узровень трывогі.
Польская чыгунка таксама паведамілі пра шматгадзінныя затрымкі і адмены цягнікоў з-за моцных снегападаў. Пра адмены рэйсаў паведамлялася і ў аэрапортах Босніі і Герцагавіны, а таксама Швецыі.
Каментары