У пачатку 2026 года падчас камбінаваных паветраных атак на Украіну расійскія войскі ўпершыню выкарысталі новы ўдарны беспілотнік «Герань-5». Галоўнае ўпраўленне разведкі Мінабароны Украіны атрымала першыя ўзоры для даследавання і апублікавала падрабязнасці.
Новы апарат большы за папярэднікаў. Беспілотнік мае даўжыню каля 6 метраў і размах крылаў да 5,5 метра. Маса баявой часткі складае каля 90 кг, заяўленая дальнасць паражэння — каля 1 000 км.
У адрозненне ад класічных «Гераняў», гэты дрон выкананы па нармальнай аэрадынамічнай схеме (крыло дрона размешчана спераду, а хваставая частка ззаду, як у звычайных самалётаў).
Ваенныя эксперты ГУР адзначаюць, што «Герань-5» не з'яўляецца цалкам расійскай распрацоўкай. Ён мае істотнае канструктыўнае падабенства з іранскім беспілотнікам Karrar.
Паводле інфармацыі ГУР, расіяне таксама распрацоўваюць варыянты выкарыстання «Герань-5» з авіяцыйных носьбітаў, у прыватнасці самалётаў Су-25, з мэтай павелічэння дальнасці. Асобна разглядаецца магчымасць аснашчэння апарата ракетамі класа «паветра-паветра» для супрацьдзеяння ўкраінскай авіяцыі.
Каментары