Экстрэмісцкімі прызналі тры творы беларускай літаратуры. А таксама збор твораў Цвікевіча, аўтара кнігі «Заходнерусізм»
Суд Партызанскага раёна Мінска прызнаў «экстрэмісцкімі» матэрыяламі сайт і старонку ў Instagram кнігарні knihi.bу — яна належала Алесю Яўдаху, які нядаўна арыштоўваўся па «справе кнігароў». Таксама гэты статус атрымалі чатыры беларускамоўныя кнігі, з якіх тры — літаратурныя творы, а адна — зборнік твораў беларускага нацыянальнага дзеяча.
Суд Кастрычніцкага раёна Мінска прызнаў «экстрэмісцкімі» наступныя кнігі:
- Каміла Цень. «Наступны прыпынак — смерць»;
- Макс Шчур. «Там, дзе нас няма»;
- Аляксандр Цвікевіч. «Гiстарычныя працы том 1»,
- Макар Валынкін. «Апошняе пакаленне».
Каміла Цень, Макс Шчур і Макар Валынкін — сучасныя беларускія літаратары, творы якіх выдаваліся ў апошнія гады эміграцыйнымі выдавецтвамі.
Што да Аляксандра Цвікевіча, то гэта вядомы беларускі нацыянальны дзеяч, апошні прэм'ер эміграцыйнага ўрада БНР, які пасля яго ліквідацыі на Берлінскай канферэнцыі ў кастрычніку 1925 года выехаў у БССР. Там ён напісаў і выдаў грунтоўную кнігу «Западно-руссизм: нарысы з гісторыі грамадскай мыслі на Беларусі ў ХІХ і пачатку ХХ в.». Праўда, адразу пасля яе выхаду ён у 1930 годзе быў арыштаваны па фальсіфікаванай справе «Саюза вызвалення Беларусі», а ў 1937 годзе быў расстраляны. Кніга таксама трапіла пад рэпрэсіі і да шырокага чытача дайшла толькі ў 1990‑я гады, калі была перавыдадзена ўжо ў незалежнай Беларусі. У гэтым томе, які цяпер абвешчаны «экстрэмісцкім», яна таксама ёсць.
Акрамя таго, экстрэмісцкі спіс гэтым разам папоўнілі:
- старонка ў фэйсбуку «Беларусы Флорыды»;
- старонкі ў інстаграме pahoniapobac, americanbelarusfoundation, byaction_usa, Belarusian Miracle, aija.stacenko;
- старонка ў тыктоку «цукерка».
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне59
Каментары