«З’явіліся шанцы на выратаванне». Пякарня LЁN, якая абвясціла пра закрыццё, пакуль працягне працу
Дзякуючы вялікай падтрымцы наведвальнікаў і калег па сферы, у заснавальнікаў пякарні ўсё ж з’явіліся новыя шанцы змагацца за яе захаванне на тым жа месцы.
Пазаўчора з'явілася інфармацыя, што Мінску закрываецца папулярная пякарня «Лён» (LЁN). Пра спыненне працы ўстанова паведаміла на сваёй старонцы ў Instagram 18 чэрвеня. Апошнім рабочым днём праекта мелася стаць заўтра, аднак у пятніцу стала вядома: пакуль пякарня працягне працу і далей, піша Onliner.by.
Прычынай закрыцця стала скасаванне дамовы арэнды памяшкання на вуліцы Ракаўскай, 25/1. Па словах уладальнікаў, менавіта ў гэтым будынку размяшчалася вытворчасць — гэта значыць, закрываецца ўвесь праект, а не толькі аднайменная кавярня.
— Мы пяць месяцаў у судзе змагаліся за сваё права працягваць працу ў гэтым месцы, бо менавіта тут размешчана не толькі наша кавярня, але і вытворчасць, і скасаванне дамовы па сутнасці азначае гібель кампаніі. На жаль, учора мы прайгралі апеляцыйны суд, — паведамілі ў чацвер прадстаўнікі пякарні. Уладальнікі адзначылі, што прынялі рашэнне спыніць далейшую барацьбу, бо яна больш «не адпавядае тым каштоўнасцям і мэтам, дзеля якіх ствараўся праект».
Апошні дзень працы «Льна» быў запланаваны на 21 чэрвеня. Пасля гэтага ўстанова павінна была закрыцца для наведвальнікаў. Але ўчора стала вядома, што нядзеля — не апошні рабочы дзень «Лёну».
Дзякуючы вялікай падтрымцы наведвальнікаў і калег па сферы, у заснавальнікаў пякарні ўсё ж з’явіліся новыя шанцы змагацца за яе захаванне на тым жа месцы. Пра гэта расказала ўладальніца праекта Алена Казлоўская.
На старонцы ўстановы ўжо з’явіўся новы допіс з крыху больш добрымі навінамі, чым учора.
— Шчыра скажам: мы пакуль не ведаем, як будуць развівацца падзеі далей і колькі часу зможам працягваць працу ў бягучым фармаце. Але вельмі спадзяёмся, што ўсе працэсы будуць адбывацца ў межах заканадаўства і мы зможам своечасова паведамляць вам пра ўсе змены.
Каманда «Лёну» просіць паставіцца з разуменнем да чэргаў, затрымак і перабояў у асартыменце: установа ўжо была настроена закрывацца, а занадта шмат мінчан прыйшло з ёй развітвацца.
Таксама Алена Казлоўская патлумачыла, што перанос вытворчасці і кавярні ў іншае месца малаверагодны з-за многіх прычын. Фактычна пераезд будзе азначаць запуск праекта з нуля. «Гэта ўжо будзе не той «Лён»», — пракаментавала ўладальніца.
Цяпер чытаюць
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі27
Каментары