Начальнікам «Воўчых нораў» прызначылі афіцэра з калоніі ў Навасадах
Дзмітрый Несцяровіч раней курыраваў дыстанцыйныя багаслоўскія курсы для зняволеных і антынаркатычныя стрымы для школьнікаў. Цяпер ён узначаліў калонію, вядомую ціскам на палітвязняў.
З 1 верасня начальнікам папраўчай калоніі №22 у Івацэвіцкім раёне стаў Дзмітрый Несцяровіч, паведамляе Mayday.Team.
Да гэтага падпалкоўнік унутранай службы працаваў намеснікам начальніка па папраўчым працэсе ў калоніі №14 строгага рэжыму ў вёсцы Навасады Барысаўскага раёна.
Там Несцяровіч курыраваў дыстанцыйныя багаслоўскія курсы, а таксама відэасувязь паміж зняволенымі і іх дзецьмі: асуджаныя чыталі ім кнігі. Ён арганізоўваў і стрымы для школьнікаў, падчас якіх асуджаныя за нарказлачынствы расказвалі пра наступствы ўжывання наркотыкаў.
Папярэдні начальнік «Воўчых нораў» Віктар Свірыд у ліпені сышоў на пенсію пасля дасягнення 50 гадоў. Часова калоніяй кіраваў яго намеснік Аляксандр Шэлест, аднак на пасадзе яго не зацвердзілі.
Калонія №22 размяшчаецца прыкладна за 20 кіламетраў ад Івацэвічаў на тэрыторыі былой савецкай вайсковай часткі. У студзені праваабаронцы паведамлялі, што там утрымлівалі не менш за 59 палітвязняў, а таксама, што на палітычных узмацнілі ціск.
Цяпер чытаюць
У Гомелі за палітыку асудзілі кіраўніка аб'яднання, якое шукае парэшткі ахвяраў вайны і сталінскіх рэпрэсій, і яго жонку-медсястру4
Каментары