У Мінску хочуць выдзяляць асобныя палаты для жанчын пры перапыненні цяжарнасці
На круглым стале «Акушэрства даверу», арганізаваным Камітэтам па ахове здароўя Мінгарвыканкама, асобна закранулі тэму падзелу пацыентак у гінекалагічных аддзяленнях і дапамогі жанчынам пры перапыненні цяжарнасці, піша Onliner.by.
Як адзначылі на сустрэчы, ужо больш за пяць гадоў у сталічных гінекалагічных аддзяленнях імкнуцца размяшчаць у розных палатах жанчын, якія захоўваюць цяжарнасць, і пацыентак, якія паступілі для аперацый або перапынення цяжарнасці. Гэта робяць для псіхалагічнага камфорту будучых мам і зніжэння лішняга стрэсу.
Пры гэтым медыкі прызналі, што сітуацыя падчас лячэння можа змяніцца. Калі цяжарнасць не ўдаецца захаваць, статус пацыенткі змяняецца, таму, на думку ўдзельнікаў круглага стала, сістэма павінна ўлічваць і такія выпадкі.
Адной з прапаноў было прадугледзець асобныя палаты для жанчын, якія перажываюць перапыненне цяжарнасці або рэпрадуктыўную страту. Таксама прапануецца праводзіць з такімі пацыенткамі кансультацыі псіхолага або псіхатэрапеўта да пачатку працэдуры.
Асобна плануюць інфармаваць сем'і пра юрыдычныя аспекты і магчымасць правядзення рытуалаў пахавання пры страце цяжарнасці на тэрміне больш за 22 тыдні. Акрамя таго, у Мінску хочуць павысіць узровень псіхалагічнай падрыхтоўкі медработнікаў, у тым ліку навучыць медсясцёр і санітарак этыцы зносін з пацыенткамі. Для профільных псіхолагаў і псіхатэрапеўтаў плануюць дадатковую падрыхтоўку ў галіне перынатальнай псіхалогіі.
На круглым стале таксама абмеркавалі выдзяленне спецыялістаў па грудным гадаванні ў радзільнях, усталяванне надзейных сістэм выкліку медперсаналу ў палатах, даследаванне патрэбаў будучых бацькоў і змяненне працы радзільняў у інтэрнэце.
У абмеркаванні ўдзельнічалі старшыня Камітэта па ахове здароўя Мінгарвыканкама Юрый Горбіч, кіраўнікі сталічных радзільняў, прадстаўнікі БДМУ і пацыенцкай супольнасці — у тым ліку маладыя і шматдзетныя бацькі.
Каментары