Siońnia — Dzień Voli: u Minsku projdzie tradycyjnaja akcyja, pačatak šeścia a 16-j
25 sakavika 1918 hoda była abvieščana niezaležnaść Biełaruskaj Narodnaj Respubliki. Pieršy raz u novaj historyi naš narod zajaviŭ tady pra svajo prava na dziaržavu.
Što b ni vieraščała prapahanda, biełarusy pavinny pamiatać hetuju datu, kali jany biełarusy. U 1918 byŭ pakładzieny pačatak.
Historyja XX stahodździa daje nam jasnuju navuku. Kali Biełaruś pastanović, nichto nie strymaje jaje ŭ žadańni zbudavać svoj mocny i zručny jeŭrapiejski dom. Taki, jaki ŭ XX stahodździ ŭźviali finy, estoncy, čechi… Ale dla hetaha treba mudraść i nacyjanalnaje adzinstva.
25 Sakavika hramadstvam tradycyjna adznačajecca Dzień Voli. Na aficyjnym uzroŭni heta data ŭ krainie nie śviatkujecca.
Pradstaŭniki hramadskaści majuć pravieści tradycyjnaje šeście i mitynh u Minsku. Vuličnyja akcyi z nahody Dnia Voli zaŭsiody ŭ budnija dni pravodzilisia viečaram. Sioleta šeście i mitynh płanavalisia z 17.00 da 20.00, ale Minharvykankam unios svaje karektyvy.
Zbor udzielnikaŭ kala kinateatra «Kastryčnik» dazvoleny z 15.00 da 16.00, šeście — z 16.00 da 17.00, mitynh u parku Družby Narodaŭ — z 17.00 da 18.00. Svajo rašeńnie źmianić čas akcyi čynoŭniki tłumačyli tym, što vuličnaje šeście ŭ hadzinu pik nibyta stvaraje šmat niazručnaściaŭ minčanam, jakija viartajucca z pracy.
Pradstaŭniki apazicyi rascanili dziejańni haradskich uładaŭ jak sprobu sarvać śviatkavańnie Dnia Voli, nie daŭšy mahčymaści pryjści na akcyju tym, chto pracuje dniom. «My zaklikajem pryjści na Dzień Voli ŭsich, kamu važnyja kaštoŭnaści niezaležnaści, salidarnaść z Ukrainaj. Kali jość mahčymaść, biarycie adhuły. Manipulacyi minskich uładaŭ nie pavinny nam pieraškodzić pakazać, što kaštoŭnaści niezaležnaści i suvierenitetu dla nas pa-sapraŭdnamu važnyja», — zajaviŭ Alaksiej Janukievič.
Asnoŭny deviz śviatkavańnia Dnia Voli ŭ hetym hodzie — «Za mir i niezaležnaść». Jaho temy — niezaležnaść Biełarusi, salidarnaść z Ukrainaj, a taksama pratest suprać antydemakratyčnaj palityki biełaruskich uładaŭ.
Łukašenka niervova prakamientavaŭ vizit Cichanoŭskaj u Kijeŭ45
Kamientary