Staršynia Dziaržpahrankamiteta chłusiŭ baćkam sałdat pra abstanoŭku na ŭkrainskaj miažy
Staršynia Dziaržpahrankamiteta Anatol Łapo sustreŭsia z vajskoŭcami terminovaj słužby i ich baćkami. Ab hetym BiełTA paviedamili ŭ Dziaržpamiežkamitecie. Miarkujučy pa paviedamleńni ahienctva, na sustrečy Łapo raspaŭsiudžvaŭ zaviedama chłuślivuju infarmacyju.
Kiraŭnik pamiežnaha viedamstva zapeŭniŭ baćkoŭ vajskoŭcaŭ, što pamiežniki vykonvajuć i buduć vykonvać zadačy pa pryznačeńni tolki na terytoryi Biełarusi, paviedamlaje BiełTA. U toj ža čas jon raskazvaŭ zaviedamyja fejki pra situacyju na miažy i dziejańni ŭkrainskaha boku.
Łapo kazaŭ baćkam sałdat, što ŭkrainski bok praciahvaje zasiarodžvać svaje siły pablizu dziaržaŭnaj miažy, stavić zaharody i inžyniernyja zbudavańni, a taksama ažyćciaŭlaje miniravańnie daroh.
«My sabrali baćkoŭ sałdat, kab danieści im abstanoŭku, jakaja składvajecca na miažy. Viadoma, jość napružańnie i z polskaha boku, i z boku bałtyjskich krain, ale asablivaj uvahi zasłuhoŭvaje ŭkrainski kirunak. Tam pamiežniki niasuć słužbu va ŭzmocnienym režymie, tamu ź ich boku na miažu časta vychodziać ludzi biez apaznavalnych znakaŭ. Akramia hetaha, byli situacyi pravakacyj i abrazy našych dziaržaŭnych simvałaŭ. Adnak, my ŭ lubym vypadku budziem nieści słužbu. Sił i srodkaŭ abaranić našu dziaržaŭnuju miažu ŭ nas dastatkova», — padkreśliŭ staršynia Dziaržpahrankamiteta.
Jon adznačyŭ, što ŭ achovie miažy z ukrainskaha boku ŭ asnoŭnym zadziejničany nie pamiežniki, a siły terytaryjalnaj abarony i masa inšych farmiravańniaŭ siłavoha błoka, ź jakimi pravodziacca roznyja vučeńni. Da biełaruskaj miažy padychodziać uzbrojenyja hrupy ludziej, jakija nie majuć ni znakaŭ adroźnieńnia, ni formiennaha abmundziravańnia. Nieadnarazova fiksavalisia pravakacyjnyja dziejańni, kali ŭkrainskija vajskoŭcy celacca ŭ biełaruskich pamiežnikaŭ, stralajuć u pavietra, čaściakom znachodziačysia ŭ niećviarozym stanie. Akramia taho, aktyŭna vykarystoŭvajucca płaŭsrodki i inšaja technika taksama biez apaznavalnych znakaŭ. Fiksujecca viadzieńnie aptyčnaj, radyjoelektronnaj i radyjotechničnaj raźviedki biełaruskaj terytoryi.
Dadatkovuju napružanaść, śćviardžaje Łapo, stvarajuć i inicyjatyvy Ukrainy z metaj dasiahnieńnia stabilnaści na ŭkrainska-biełaruskaj miažy raźmiaścić manitorynhavyja misii z krain NATA. Znachodžańnie na ŭkrainska-biełaruskaj miažy ŭzbrojenych pradstaŭnikoŭ zachodnich krain moža być vykarystana dla ažyćciaŭleńnia roznaha rodu pravakacyj i navat raźviazvańnia kanfliktu, miarkuje jon.
Pa słovach kiraŭnika viedamstva, biełaruskija pamiežniki apieratyŭna adsočvajuć źmieny stanovišča i hatovyja prymać usie nieabchodnyja miery ŭ adkaz.
Łapo raspaŭsiudžvaŭ zaviedama łžyvuju infarmacyju pra toje, što pravakacyi na miažy ładzić ukrainski bok. Nasamreč, niahladziačy na toje, što Rasija ŭvarvałasia va Ukrainu, u tym liku z terytoryi Biełarusi, za vosiem miesiacaŭ vajny na biełaruskuju terytoryju nie prylacieŭ nivodzin ukrainski snarad, tady jak ź biełaruskaj terytoryi ažyćciaŭlałasia sproba zachopu Kijeva, rasijskija vojski atakavali taksama ŭ kirunku Žytomira i Čarnihava, nanosilisia rakietnyja ŭdary, a biełaruskija vojski ažyćciaŭlali pry hetym tyłavoje zabieśpiačeńnie. Mienavita heta stvaryła pahrozu ŭciahvańnia Biełarusi ŭ vajnu.
Kamientary