Artyst «Biełaruskich pieśniaroŭ» Uładzisłaŭ Misievič raspavioŭ, jak syšoŭ z ansambla ŭ 2020-m
«Za majoj śpinaj padpisvali niejkija mutnyja listy «suprać hvałtu i za novyja vybary»!»
Artyst Uładzisłaŭ Misievič spyniŭ supracoŭnictva z «Biełaruskimi pieśniarami» ŭ 2020‑m.
«Syšoŭ, pry tym, što «Biełaruskija pieśniary» — heta majo dziecišča. I ja za jaho raźvićcio adkazvaŭ, pakul nie nastupiŭ 2020‑y.
Miarkujcie sami: my rychtavalisia adznačyć jubilej «Pieśniaroŭ», a ŭ hety čas za majoj śpinaj niekatoraja kolkaść udzielnikaŭ kalektyvu padpisvaje niejkija mutnyja listy «suprać hvałtu i za novyja vybary»! Heta nazyvajecca ansambl, heta hrupa adnadumcaŭ?
Mianie sprabujuć ciapier vinavacić — maŭlaŭ, heta ja za ich adkazvaju, ale jany vialikija chłopčyki, niekatorym pa 70 hadoŭ užo. Ja moh tolki pahavaryć i dumaŭ, što my damovilisia», — raspavioŭ Uładzisłaŭ Misievič u intervju «SB».
Jon ličyć, što kalehi pryniali taki bok, bo pajšli za natoŭpam.
Artyst dadaŭ taksama, što ciapier iduć razmovy nakont praciahu sieryjała pra «Pieśniaroŭ» («Za paŭhadziny da viasny»), jaki vyjšaŭ na rasijskim «Pieršym kanale».
«Ja adrazu pradziusaram skazaŭ: kali tam buduć maje byłyja kalehi pa «Biełaruskich pieśniarach», ja da hetaha nijakaha dačynieńnia mieć nie žadaju. Tak, razumieju, pośpiech, i «Pieršy kanał» zadavoleny, ale tam nie viedajuć dalejšuju historyju…» — panarakaŭ jon.
Misievič ciapier pačaŭ solnuju karjeru.
«Biełaruskija pieśniary» ŭtvarylisia ŭ 1998-m paśla raskołu ŭ «Pieśniarach».
Na hety Novy hod hurt śpiavaŭ na «Błakitnym ahieńčyku» na rasijskim TB ź vinšavańniami Kisialova dy Sałaŭjova i žartami Pietrasiana pra Ukrainu.
Kamientary