Paśla danosaŭ prarasijskich aktyvistaŭ papularnamu siarod padletkaŭ błohieru Dzim Dzimyču zabaranili vystupać u škołach
Błohieru Dźmitryju Siŭčyku, viadomamu pad psieŭdanimam Dzim Dzimyč, zabaranili ŭdzielničać u školnych mierapryjemstvach. Adkaz ad Ministerstva adukacyi apublikavała ŭ svaim kanale hrodzienskaja prapahandystka Volha Bondarava.
U adkazie na imia niejkaj Aleny Vasiljeŭny havorycca, što Minadukacyi na daručeńnie Aparata Savieta Ministraŭ Respubliki Biełaruś razhladzieła jaje zvarot, jaki «pastupiŭ z Administracyi Prezidenta Respubliki Biełaruś ».
«Pa vynikach razboru kiraŭnikam ustanoŭ adukacyi było ŭkazana na niedapuščeńnie ŭdziełu ŭ mierapryjemstvach zabaŭlalnaha charaktaru artystaŭ, tvorčaść jakich moža niehatyŭna paŭpłyvać na farmiravańnie sistemy duchoŭna-maralnych i maralna-etyčnych kaštoŭnaściaŭ u niepaŭnaletnich», — havorycca ŭ adkazie.
U liście, padpisanym načalnikam Hałoŭnaha ŭpraŭleńnia vychavaŭčaj raboty i moładzievaj palityki Viktaram Doŭnaram, adznačajecca, što ŭ 2023 hodzie byŭ tolki adzin fakt udziełu hetaha błohiera ŭ školnym mierapryjemstvie.
Čynoŭnik napisaŭ, što heta pytańnie znachodzicca na kantroli ŭ Minadukacyi.
«20 kastryčnika 2023 hoda na naradzie z namieśnikami načalnikaŭ hałoŭnych upraŭleńniaŭ adukacyi abłasnych vykanaŭčych kamitetaŭ dadatkova budzie źviernutaja ŭvaha na niedapuščeńnie ŭdziełu ŭ mierapryjemstvach Dźmitryja Siŭčyka», — dadaŭ Doŭnar.
Pavodle jaho, Minadukacyi «padtrymlivaje mierkavańnie adnosna taho, što vykarystańnie vobraza Dźmitryja Siŭčyka, jaki charaktaryzujecca niehatyŭnymi vykazvańniami i sacyjalna nieŭchvalalnymi pavodzinami ŭ publičnaj prastory» moža «niespryjalna adbivacca na raźvićci i stanaŭleńni asoby niepaŭnaletnich».
Čynoŭnik padziakavaŭ aŭtaru zvarotu za nieabyjakavaje staŭleńnie da pytańniaŭ vychavańnia dziaciej i moładzi.
Dzima Siŭčyk — papularny błohier. U jaho jutub-kanała 6 miljonaŭ padpisčykaŭ, a ŭ tyktoku — 2 miljony. Asnoŭnaja jaho aŭdytoryja — padletki.
Dziaržaŭnyja orhany i prapahanda źviarnuli na jaho ŭvahu paśla danosaŭ prarasijskaj aktyvistki Volhi Bondaravaj. Taja aburałasia, što błohier adziavajecca ŭ ružovaje, a ŭ niekatorych žartaŭlivych rolikach byŭ u sukiency, i vinavaciła jaho ŭ prapahandzie ŁHBT.
Paśla jaje skarhaŭ z sajta «Jeŭraopta» źniali rekłamu ź Dzim Dzimyčam, a jaho samoha adpravili ŭ efir da prapahandysta Ryhora Azaronka.
Paźniej błohiera-miljońnika vyklikali ŭ Ministerstva kultury. «Tam my parazmaŭlali nakont majho kantentu, unieśli pravilnyja karekciroŭki», — raspavioŭ błohier u instahramie.
Ciapier čytajuć
Ci zakryjuć Jeŭropu dla biełarusaŭ? Daradca Cichanoŭskaj raspavioŭ, pra što damoviŭsia ŭ Bierlinie12
Kamientary