Aranžavyja i sinija pamianialisia pazicyjami

Zhodna z usimi ekzit-połami, treciaje miesca zaniaŭ bankir Cihipka, a dziejny prezident Juščanka finišuje tolki piatym. Vyniki padliku hałasoŭ supali z dadzienymi ekzit-połaŭ.

Šali ŭkrainskaj palityki schililisia na ŭschod.

Bolšaść ekzit-połaŭ dajuć razryŭ paradku 10% miž lideram apazicyjnaj Partyi rehijonaŭ Viktaram Janukovičam i prem'jer-ministram Julijaj Cimašenka. Zhodna sa źviestkami apytańnia kanała Inter, pieršy nabiraje 36,6%, druhaja — 25,8%. Treciaje miesca zaniaŭ blizki da eks-prezidenta krainy Leanida Kučmy bankir Siarhiej Cihipka — 13,5%.

Za dziejnaha prezidenta Viktara Juščanku prahałasavali mienš za 6%.

Jaho niaznačna abahnaŭ inšy papularny na zachadzie krainy palityk Arsień Jacaniuk.

Jacaniuk, Juščanka i dva inšyja nacyjanalna-demakratyčnyja kandydaty razam nabirajuć kala 15% hałasoŭ.

U demakratyčnaj Ukrainie nichto nie zahaniaje ludziej na vybary, tamu i jaŭka akazałasia rekordna nizkaj — 67%. Pieradvybarčy papulizm i niedatrymańnie abiacanak usimi asnoŭnymi kandydatami źnieachvocili mnohich vybarcaŭ ad udziełu ŭ hałasavańni. Adnak i suprać usich, i za błaznavataha Vasila Prociŭsicha prahałasavali ličanyja vybarcy. Davierlivyja ŭkraincy miesca treciaj siły addali adnamu z tvorcaŭ aliharchičnaj sistemy, bankiru, vice-premjer i kiraŭniku Nacyjanalnaha banku kučmaŭskaje pary Siarhieju Cihipku. Mienavita hałasy hetaha byłoha kamsamolskaha važaka mohuć vyrašyć los budučaha druhoha tura, a sam jon — stać novym premjeram Ukrainy. U 2004 hodzie akurat jon uznačalvaŭ pieradvybarny štab kandydata Janukoviča ŭ časie sfalšavanych vybaraŭ, što vyklikali Aranžavuju revalucyju.

Vyniki padliku hałasoŭ supali z dadzienymi ekzit-połaŭ. Paśla apracoŭki 80% pratakołaŭ vybarčych kamisij, lidziruje Viktar Janukovič z 35,8% hałasoŭ, na druhim miescy idzie Julija Cimašenka z 24,8%, śviedčać źviestki CVK Ukrainy. Razryŭ niaznačna, na dziesiatyja doli pracenta, skaračakajecca pa miery nadychodu źviestak ź ciažkadastupnych učastkaŭ u Karpatach, dzie Janukovič niepapularny.

Za Janukoviča pa-raniejšamu hałasujuć pieravažna rasiejskamoŭnyja ŭschodu krainy, a za Cimašenku — ukrainskamoŭnyja zachadu. U časie kampanii Janukoviča vinavacili ŭ niezakonnaj pryvatyzacyi dziaržaŭnaj rezidencyi, a Cimašenku — u vyvazie hrošaj praz afšornyja kampanii. Ni pieršaja, ni druhaja spravy nie dajšli da suda.

U časie hetaj kampanii

Janukovič vykarystoŭvaŭ centrysckuju prahramu, robiačy akcent na sacyjalnyja łozunhi. U vyniku jamu ŭdałosia sabrać dosyć šmat hałasoŭ i na zachadzie Ukrainy. U pryvatnaści, jon pierakanaŭča pieramoh u Zakarpaćci, a ŭ Chiersonskaj vobłaści, dzie ŭ 2004 hodzie Juščanka nabraŭ 43% hałasoŭ, Cimašenka sioleta atrymała tolki 19.

«Možna mierkavać, što Ukraina nie vierniecca ŭ rasijskuju zonu ŭpłyvu, chto b ni pieramoh u druhim tury vybaraŭ, — zajaviła publicystka Bahumiła Bierdychoŭskaja. — Stratehičny kurs krainy vyznačany, i jaho buduć realizoŭvać usie palityčnyja siły».

• 0
• 0
• 0
• 0
• 0
• 0
• 0
• 0