U Demakratyčnaj Respublicy Konha zajavili pra sprobu dziaržaŭnaha pieravarotu
Ranicaj 19 maja ŭ stalicy krainy Kinšasie dźvie hrupy ŭzbrojenych ludziej pasprabavali napaści na prezidencki pałac. Potym asnoŭnaha apazicyjaniera zabili.
Ułady afrykanskaj dziaržavy Demakratyčnaja Respublika Konha (były Zair) zajavili ab padaŭleńni sproby vajennaha pieravarotu. Ułady śćviardžajuć, što mierkavany arhanizatar pieravarotu byŭ zabity, kala 50 čałaviek aryštavanyja. Siarod aryštavanych troje hramadzian Złučanych Štataŭ, piša Radyjo Svaboda sa spasyłkaj na pradstaŭnika armii Konha.
Ranicaj 19 maja ŭ stalicy krainy Kinšasie dźvie hrupy ŭzbrojenych ludziej pasprabavali napaści na prezidencki pałac, a taksama na dom deputata i kandydata na pasadu śpikiera parłamienta. Śćviardžajecca, što ŭ pierastrełcy zahinuli dvoje achoŭnikaŭ, jość zahinułyja taksama z boku tych, chto napadaŭ.
Paśla ŭłady paviedamili pra zabojstva mierkavanaha kiraŭnika sproby pieravarotu, apazicyjnaha palityka Kryścijana Małanhi, jaki niekatory čas žyŭ u ZŠA.
Śćviardžajecca, što jon byŭ zabity padčas sproby zachopu prezidenckaha pałaca. Jakich-niebudź padrabiaznaściaŭ nie pryvodzicca.
Raniej u fejsbuku Małanhi źjaviłasia videa, u jakim jon kaža pra namier zrynuć ułady. Pavodle niepaćvierdžanych paviedamleńniaŭ, adzin z zatrymanych amierykanskich hramadzian — syn zabitaha apazicyjaniera.
Pasoł ZŠA ŭ Konha Lusi Tamlin zajaviła, što ŭ ambasadzie vielmi zaniepakojenyja paviedamleńniami ŭładaŭ ab mahčymym udziele amierykanskich hramadzian u sprobie pieravarotu, i paabiacała akazać uładam Respubliki poŭnaje sadziejničańnie ŭ rasśledavańni, jak havorycca ŭ paviedamleńni, «złačynnych dziejańniaŭ» miaciežnikaŭ.
Małanha byŭ adnym z najbolš viadomych kanhalezskich apazicyjanieraŭ, jakija žyli za miažoj. Paviedamlajecca, što raniej im byŭ stvorany tak zvany ŭrad novaha Zaira ŭ vyhnańni. Pry Prezidencie Mabutu Siesie Sieka, zrynutym u 1997 hodzie, ciapierašniaja Demakratyčnaja Respublika Konha aficyjna nazyvałasia Zairam.
Ciapier čytajuć
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2020
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ20
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał44
Kamientary