Biełarus u Ńju-Jorku źniaŭsia ŭ cełym siezonie sieryjała. Kolki ž atrymałasia zarabić?
Biełarus Siarhiej Citoŭ žyvie ŭ ZŠA i čas ad času zdymajecca ŭ epizadyčnych rolach u kino. Jon raspavioŭ u tyktoku, što niadaŭna źniaŭsia ŭ cełym siezonie sieryjała.
Siarhiej raskazaŭ, što byŭ, jak kažuć amierykanskija kinošniki, «rehjułaram». Heta ludzi, jakija epizadyčna źjaŭlajucca ŭ kadry na praciahu ŭsiaho siezona, a to i niekalkich. Jany nie robiać ničoha niezvyčajnaha, a faktyčna stvarajuć fon dla hałoŭnych hierojaŭ.
— Naprykład, vy hladzicie sieryjał «Dekstar». I tam u palicejskim učastku siadziać niejkija palicejskija. Zvyčajna heta buduć adnyja i tyja ž ludzi va ŭsich sieryjach.
Heta patrebna dla taho, kab hledačy adčuvali źviazanaść sieryj. Takich akcioraŭ masoŭki jašče nazyvajuć pa-anhielsku core (jadro). Trapić u «jadro» — vialiki pośpiech, bo heta harantuje šmat pracy. A kali sieryjał raściahvajecca na niekalki siezonaŭ — uvohule cudoŭna.
Nazvu sieryjała Siarhiej nie ahučvaje, ale kaža, što, na žal, siezon tam zapłanavany tolki adzin, bo zdymali jaho pa knizie. Usiaho ŭ mužčyny atrymałasia 14 zdymačnych dzion, u siarednim biełarus zarablaŭ pa $233 za dzień.
Pry hetym u inšych prajektach za zdymačny dzień, byvaje, płaciać i pa 300, 400, 500 dalaraŭ. Siarhiej tłumačyć, čamu ŭ hetym sieryjale mieniej:
— Jany zdymali ŭsio pa płanie, nie vychodzili ŭ zvyšuročnyja, nie pierapłačvali ludziam. I ŭvohule, niekalki dzion my prychodzili na zdymačnuju placoŭku a 10-j ranicy i sychodzili a 2-j hadzinie dnia, tamu što ŭsio było źniata.
Siarhiej udakładniŭ, što jaho 14 zdymačnych dzion raściahnulisia na niekalki miesiacaŭ.
— Usiaho ja zarabiŭ $3262 za zdymki ŭ siezonie sieryjała. Narmalna? Dośvied byŭ cikavy.
U inšym videa Siarhiej raspaviadaŭ, kolki zarabiŭ, kali byŭ tym samym «fonavym» palicejskim — zdymačny dzień doŭžyŭsia 12 hadzin, bolšuju častku ź jakich mužčyna prosta siadzieŭ ci stajaŭ u kadry ŭ formie.
— Bazavaja staŭka: 8 hadzin — $216. Paśla jašče dźvie hadziny pa staŭcy $41,61 za hadzinu (usiaho $83). Z 10-j da 12-j hadziny apłata ŭžo $55 za hadzinu. Za toje, što ja pryjšoŭ sa svajoj palicejskaj formaj, mnie dapłacili $36 dalaraŭ (akupiŭ furažku, jana kaštavała $33). Na zdymkach išoŭ doždž — za heta dapłacili $16,5, jašče stolki ž dapłacili za toje, što na placoŭcy vykarystoŭvali dym i byli vybuchi.
I praz toje, što mianie padniali ranicaj (heta byŭ terminovy vyklik na zdymačnuju placoŭku), mnie naličyli $6,66. Usiaho ja atrymaŭ 436 dalaraŭ 71 cent.
Raniej «Našaj Nivie» pra svaju pracu ŭ masoŭcy raspaviadaŭ biełarus Siarhiej Uljanaŭ, jaki niadaŭna atrymaŭ u ZŠA palityčny prytułak. Siarhiej zdymaŭsia ŭ jakaści hledača ŭ navahodnim kancercie Rockin'Eve with Ryan Seacrest, jaki pakazvali ŭ ZŠA ŭ noč z 31 śniežnia na 1 studzienia.
— Heta kancert z pramymi ŭklučeńniami z roznych rehijonaŭ ZŠA sa svaimi vystupoŭcami. U Łos-Anželesie heta byli Ellie Goulding, 30 seconds to Mars, Aqua, Greed Day i inšyja. Zdymki ŭ im u jakaści hledača stali adnoj z maich pieršych prac u Łos-Anželesie, — raskazaŭ Siarhiej Uljanaŭ. — Za dva dnia zdymak zarabiŭ kala $500 paśla vyliku padatkaŭ.
Kamientary
3-ci kłas?
******************
U nazoŭnym skłonie množnaha liku nazoŭniki majuć kančatki -y, -i.
*
Dla nazoŭnikaŭ na -anin, -janin charakterny kančatak -je: hramadzianin — hramadzianie, sielanin — sialanie.
Niekatoryja nazoŭniki pry ŭtvareńni množnaha liku źmianiajucca i ŭ svajoj asnovie: dziaŭčyna — dziaŭčaty (ALE! dźvie/try dziaŭčyny), nieba — niabiosy, ziernie — ziarniaty, ciala — cialaty, ptušania — ptušaniaty, kurania — kuraniaty.