Charys zaručyłasia dastatkovaj padtrymkaj dla vyłučeńnia kandydatam u prezidenty
Viadučyja demakraty stali ŭ čarhu, kab padtrymać jaje kandydaturu.
Vice-prezident ZŠA Kamała Charys zaručyłasia farmalnaj padtrymkaj dastatkovaj kolkaści delehataŭ, kab stać kandydatam u prezidenty ad Demakratyčnaj partyi, paviedamlajuć Associated Press i telekampanija CNN sa spasyłkaj na ŭłasnyja daśledavańni, piša Bi-bi-si.
«Da viečara paniadziełka Charys padtrymała prynamsi 2 579 delehataŭ, što bolš, čym 1 976 delehataŭ, nieabchodnych joj dla pieramohi ŭ pieršym tury hałasavańnia», — piša Associated Press.
«U toj čas jak adabreńni delehataŭ praciahvajuć pastupać, Charys užo padtrymała značna bolš, čym 1 976 delehataŭ», — paviedamlaje, u svaju čarhu, CNN.
Telekampanija adznačaje, što jaje padliki zasnavanyja na publičnych zajavach ab padtrymcy z boku delehataŭ i delehacyj Štataŭ, razmovach z delehatami i ŭłasnych materyjałach.
Hetyja ličby nie źjaŭlajucca kančatkovymi, a padtrymka nie aznačaje aficyjnaj naminacyi — delehaty ŭsio jašče pavinny prahałasavać na źjeździe partyi, jaki adkryjecca 19 žniŭnia ŭ Čykaha. Pry hetym, jak paviedamlaje CNN, demakraty spadziajucca, što Charys zaćvierdziać da 7 žniŭnia.
Paśla abviaščeńnia Džo Bajdena ab zakančeńni baraćby za pasadu prezidenta byŭ zafiksavany ŭsplosk achviaravańniaŭ u kampaniju Charys, a viadučyja demakraty stali ŭ čarhu, kab padtrymać jaje kandydaturu.
Raniej stała viadoma, što za pieršyja sutki vice-prezident sabrała rekordnuju sumu ad donaraŭ Demakratyčnaj partyi — 81 młn dalaraŭ, pryčym značnuju častku achviaravańniaŭ ŭnieśli drobnyja donary.
Vystupajučy ŭ paniadziełak pierad supracoŭnikami štaba ŭ Uiłminhtanie ŭ štacie Dełaver, Charys skazała, što apošnija niekalki tydniaŭ byli «amierykanskimi horkami», ale vykazała ŭpeŭnienaść, što joj udasca abjadnać nacyju, partyju i vyjhrać vybary.
«Da dnia vybaraŭ zastałosia 106 dzion, i za hety čas nam treba budzie zrabić ciažkuju pracu», — skazała jana.
Džo Bajden taksama pryniaŭ udzieł u hetaj sustrečy — pa telefonie, pakolki pa-raniejšamu znachodzicca na samaizalacyi z kavidam, i skazaŭ supracoŭnikam štaba, što vychad z honki byŭ pravilnym rašeńniem.
«Ja viedaju, što ŭčorašnija naviny byli dla vas niečakanymi i ciažkimi, ale heta było pravilnaje rašeńnie», — skazaŭ Bajden.
Prezident pryznaŭ, što jaho kamanda «ŭkłała ŭsiu dušu» ŭ toje, kab dapamahčy jamu zastacca na druhi termin, ale skazaŭ, što nikudy nie sychodzić i maje namier zastavacca całkam uciahnutym u kampaniju.
«Ja spadziajusia, što vy addaście Kamale ŭsio svajo serca i dušu, jakija addali mnie. Nam usio jašče treba vyratavać hetuju demakratyju. Tramp pa — raniejšamu ŭjaŭlaje niebiaśpieku dla našaj nacyi», — dadaŭ jon.
Bajden pavinien viarnucca ŭ Bieły dom u aŭtorak.
Džon Koŭł pryjedzie ŭ Biełaruś 15 vieraśnia. Łukašenka, adnak papiaredziŭ: «vialikaj ździełki» nie budzie11
Kamientary