U Minskim haradskim sudzie 19 žniŭnia raspačaŭsia praces pa hučnaj spravie dyviersii ŭ Mačuliščach. Dvanaccaci čałaviekam — bolšaści zavočna — staviacca ŭ vinu adrazu 11 artykułaŭ Kryminalnaha kodeksa, u tym liku «akt teraryzmu» (č. 3 art. 289 KK) i «zdrada dziaržavie» (č. 1 art. 356 KK).
Ich abvinavačvajuć u ździajśnieńni dyviersii ŭ Mačuliščach u lutym 2023 hoda, padčas jakoj byŭ paškodžany rasijski samalot A-50. Spravu ŭ zakrytym režymie razhladaje Valancina Ziańkievič, piša «Viasna».
Hałoŭny fihurant spravy i, jak śćviardžali aficyjnyja orhany i prapahandysty, vykanaŭca dyviersii — Mikałaj Šviec, byŭ vyzvaleny ŭ červieni pa abmienie z Ukrainaj. Ale, niahledziačy na heta, pa spravie adbyvajecca sud i jaho pamahatym u Biełarusi pahražajuć vialikija terminy źniavoleńnia. Zavočna sudziać i samoha Švieca.
Tak, na łavie padsudnych znachodziacca Maksim Łapacin, Andrej Ściapurka, Aleh Syčoŭ i jahonaja žonka Anastasija Pilko, Dzianis Sakałoŭ. Zhodna z prapahandysckim filmam ANT, usie jany byli pamahatymi pa spravie, ale jany dakładna nie viedali, chto taki Šviec i ŭ čym mienavita jamu treba dapamoha. Tak, Maksim Łapacin padvioz Švieca sa Stolina na Łahojskuju trasu, Andrej Ściapurka dapamoh znajści jamu kvateru pad Minskam, Aleh Syčoŭ i Nasta Pilko zdali jamu tuju samuju kvateru.
A Dzianis Sakałoŭ, jaki vyjaviŭsia pryjacielem syna Iryny Abielskaj i mierkavanym danosčykam, byccam dapamoh dastavić dron i znajści pracu dla Mikałaja Švieca.
Zavočna sudziać Mikałaja Švieca, Alaksandra Azarava, Ału Jacutu, Vitala Jakucika, Jaŭhieniju Tačyckuju, Michaiła Dziomina i Siarhieja Łoparava.
Darečy, u raskładzie suda siarod tych, u adnosinach da kaho raspačaŭsia sud, niama Jaŭhienii Łoparavaj, ale jaje imia značycca ŭ śpisie asobaŭ, u adnosinach da jakich raspačata śpiecvytvorčaść. Zhodna apošniaj infarmacyi, jaje taksama siońnia sudziać pa spravie Mačuliščaŭ. Ale pry hetym u «zavočnikach» adsutničaje imia Siarhieja Łoparava.
Fihurantam spravy inkryminavanyja adrazu 11 artykułaŭ Kryminalnaha kodeksa:
- «sadziejničańnie ŭ ekstremisckaj dziejnaści» (č. 1 art. 361-4 KK), «finansavańnie terarystyčnaj dziejnaści» (č. 1 art. 290-1 KK), «zdrada dziaržavie» (č. 1 art. 356 KK),
- «udzieł u dziejańniach, jakija hruba parušajuć hramadski paradak» (č. 1 art. 342 KK),
- «ahienturnaja dziejnaść» (č. 1 art. 358 KK), «pryviadzieńnie ŭ niaspraŭnaść transpartnaha srodku» (č. 4 art. 309 KK),
- «akt teraryzmu» (č. 3 art. 289 KK),
- «stvareńnie abo ŭdzieł u ekstremisckim farmavańni» (č. 3 art. 361-1 KK),
- «finansavańnie ekstremisckaha farmavańnia» (361-2 KK), «niezakonnyja dziejańni datyčna vybuchovych rečyvaŭ» (č. 4 art. 295 KK),
- «prachodžańnie navučańnia dla ŭdziełu ŭ terarystyčnaj dziejnaści» (art. 290-3 KK).
Nahadajem, ranicaj 26 lutaha 2023 hoda na aeradromie Mačuliščy zdarylisia vybuchi kala kaštoŭnaha rasijskaha samalota dalniaj raźviedki DRŁV A-50, jon byŭ padarvany ŭ dvuch miescach. Jon vykarystoŭvaŭsia dla naviadzieńnia rasijskich rakiet na celi va Ukrainie.
Paviedamlałasia, što ciapier samalot znachodzicca na ramoncie na 325-m avijacyjnym ramontnym zavodzie, jaki ŭvachodzić u skład Tahanrohskaha avijacyjnaha navukova-techničnaha kompleksu imia Bieryjeva ŭ Rasii.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna13
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1313
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha13
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5454
Kamientary