Kamu pa kišeni? Ahlad kredytaŭ na nieruchomaść ad biełaruskich bankaŭ

Varta adrazu adznačyć, što bolšaść kredytaŭ prapanoŭvajecca terminam na 20 hadoŭ z opcyjaj kredytavańnia da 90% koštu žytła. To-bok, minimum 10% uniosku za budučuju žyłpłošču treba nakapić samastojna.

Bolšaść kredytaŭ Biełarusbanka praduhledžvaje śpiecyjalnyja ŭmovy i tyčycca admysłovych dziaržprahram. Dastupnaja ŭsim «Ipateka Ekspres» na nabyćcio žytła prapanoŭvajecca pad 16% hadavych (12,5% — dla hramadzian, jakija majuć patrebu ŭ palapšeńni žyllovych umoŭ i dla kupli pa miescy stajańnia ŭ čarzie).

U Biełahraprambanka ciapier u najaŭnaści čatyry prapanovy. Dla «prostych śmiarotnych» pracentnaja staŭka budzie 15,5%. Na lhotnaje dakredytavańnie ŭ 12,5% mohuć pretendavać hramadzianie z katehoryi tych, chto moža raźličvać na dziaržaŭnuju padtrymku pry budaŭnictvie žytła ŭ miežach ukaza Łukašenki №240 (byłyja prakurorskija supracoŭniki, vajskoŭcy, dzieci-siroty i inš.), a taksama tyja, chto abjektyŭna maje patrebu ŭ palapšeńni žyllovych umoŭ.

U miežach prahramy «Chutka navasielle» ad Biełhazprambanka možna raźličvać na 12% hadavych ciaham pieršych 180 dzion karystańnia kredytam i na 14,3% nadalej. Tańniejšy šlach — nabyvać žytło ŭ zabudoŭščykaŭ-partnioraŭ banka («A100deviełapmient», «Zialonaja havań» i inšyja): pry takim raskładzie ŭ pieršyja 180 dzion staŭka składzie 4,99%, ale paśla budzie taksama 14,3%.

Bolšaść prapanoŭ Pryjorbanka ciapier sa staŭkaj 14,5%. Lhotnyja 12,5% praduhledžanyja na budavańnie pad zakład ź dziaržaŭnaj padtrymkaj u miežach taho ž ukaza №240.

Technabank zavablivaje biełarusaŭ farmuloŭkaj: «my asensavana vybirajem dla našych klijentaŭ samyja vyhadnyja ŭmovy kredytavańnia, kab dapamahčy im realizavać svaje mary pra žytło». Na siońnia ŭ banka aktualnyja dźvie prapanovy kredytavańnia z pracentnaj staŭkaj 16,4% terminam na 240 miesiacaŭ. Praŭda, dla afarmleńnia tut užo treba mieć na rukach minimum 20% ad cany budučaj nieruchomaści.

U Biełveba rynačnaja staŭka pa kredycie ciapier — 17,71% na nabyćcio jak pieršasnaj nieruchomaści, tak i žytła «z ruk». Tut ža dastupnaje lhotnaje kredytavańnie nieruchomaści ŭ ramkach Ukaza №240 (hadavaja staŭka — 12,5%). I pryvabnyja 5,99% u miežach partniorskaha kredytavańnia (na žal, tolki na pieršy hod, potym staŭka znoŭ stanie rynačnaj).

MTBank vydaje kredyty na nabyćcio hatovaha žytła ad zabudoŭščyka, a taksama na dolevaje budaŭnictva. Pracentnaja staŭka — ad 14% hadavych. Praz hod jana pieraŭtvorycca ŭžo ŭ 15,62%. U banka taksama jość niamała partniorskich prapanoŭ — naprykład, ź viadomymi ŽK «Depo» i «Novaja Baravaja». U pieršyja paŭhoda-hod pry nabyćci žytła ŭ takich zabudoŭščykaŭ kredytnaja staŭka budzie składać ad 2,5 da 6%, ale potym pierakročyć za 15%.

Asnoŭnaja pracentnaja staŭka ŭ Biełaruskaha narodnaha banka składaje 16% hadavych. Bank supracoŭničaje z «A-100», i tamu prapanoŭvaje niekalki hnutkich prahram ipateki — paŭpłyvać na lhoty moža suma ŭłasnaha ŭniosku.

Bank «Handlovy kapitał» hatovy finansavać nie bolš za 80% ad koštu majomaści. Staŭka — 14,5% hadavych.

Chto sabie heta moža dazvolić?

Vidavočna, što ŭ składčynu, siamjoj, budzie praściej. Zhodna z apošnimi danymi Biełstata za žnivień naminalny siaredni zarobak u Biełarusi skłaŭ 2 341 rubiel (da vyliku padachodnaha padatku). Z ulikam vypłaty padatkaŭ — heta krychu bolš za dźvie tysiačy rubloŭ.

Kali padavacca z takim dachodam u Biełarusbank na raniej zhadany «Ekspres kredyt» z 16-pracentnaj staŭkaj hadavych, to, zhodna z raźlikami ich kalkulatara, možna raźličvać na kredyt u 57 457 rubloŭ maksimum. Pry hetym štomiesiac pryjdziecca płacić 1006 rubloŭ (ź ich 240 — pa asnoŭnaj zapazyčanaści i 766 — pa pracentach).

Spłačanyja pracenty za 20 hadoŭ karystańnia kredytam ahułam składuć amal 92 tysiačy rubloŭ.

Pavialičyć

Z takim ža dachodam u Biełahraprambanka možna raźličvać na jašče mienšuju sumu kredytu — 29 404 rubli maksimum. Pry hetym banku taksama treba budzie addavać amal tysiaču rubloŭ u miesiac, pakidajučy sabie stolki ž na žyćcio.

Pavialičyć

U stalicy kvadrat u novabudoŭlach bieź dziaržpadtrymki ciapier kaštuje ad $1150. Heta značyć, što kvatera ŭ 40 kvadrataŭ abyjdziecca minimum u $46 tysiač, ci amal u 152 tysiačy biełaruskich rubloŭ. Navat kali atrymać u banka vyšej praličanyja 57 457 rubloŭ, to nie chapaje jašče amal 95 tysiač.

Akramia taho, my nazirajem, što pa vynikach žniŭnia siaredni zarobak nie vyras, a ŭpaŭ na 14 rubloŭ. Usio heta razam z samim padaražeńniem kredytaŭ i ich pryviazki da miesca rehistracyi praciahnie ŭpłyvać na popyt na nieruchomaść.

• 0
• 1
• 1
• 0
• 1
• 0
• 0
• 0