Jak «kašalok» Łukašenki Zajcaŭ zarablaje na prodažy luksavaha adzieńnia
Kampanija, źviazanaja ź im, hatova pastaŭlać jeŭrapiejskija premium-brendy i ŭ Rasiju.
Kamanda biełaruskich žurnalistaŭ «Biuro miedyja» apublikavała novaje rasśledavańnie, u jakim raskazvajecca, jak biznesmien Alaksandr Zajcaŭ, jaki ličycca adnym z «kašalkoŭ» Alaksandra Łukašenki zarablaje na prodažy adzieńnia, abutku i aksiesuaraŭ suśvietnych brendaŭ. Zajcaŭ pry hetym u červieni 2021 hoda trapiŭ pad sankcyi ES, a paśla napadu Rasii na Ukrainu suprać jaho ŭviali piersanalnyja sankcyi i ŭłady ZŠA.
U Minsku isnuje niekalki kram pad nazvaj «Aŭtlet park», dzie sa źnižkami ad 30 da 70% pradajucca aryhinalnyja vyraby viadučych suśvietnych brendaŭ. Brend mahazina naležyć biełaruskaj kampanii «Trendchoł», dyrektarkaj jakoj źjaŭlajecca Jana Levanieŭskaja.
A voś bienieficyjaram «Trendchoła» z 1 listapada 2023 hoda źjaŭlajecca padkantrolnaja Alaksandru Zajcavu łahistyčnaja kampanija «Ruzekśpiedycyja», jakoj kiruje były pieršy namieśnik načalnika Biełaruskaj čyhunki Uładzimir Michajluk.
U pačatku žniŭnia amierykanski Minfin uklučyŭ «Ruzekśpiedycyju» ŭ novy pakiet sankcyj ZŠA jak aktyŭ Alaksandra Zajcava.
Žurnalisty vybaračna paraŭnali ceny na niekalki pazicyj u minskim aŭtlecie z aryhinalnymi cenami na sajtach vytvorcaŭ.
Jany zaŭvažyli, što ŭ adroźnieńnie ad tavaraŭ katehoryj premium i middle-up, jakija pradajucca pa źnižanych cenach, luks-siehmient biełaruski bucik realizuje albo pa aficyjnych cenach vytvorcy, albo ź vialikaj nakrutkaj.
«Biuro» vyśvietliła, što biełaruski «Trendchoł» sprabuje naładzić aptovyja pastaŭki brendavaha adzieńnia i aksiesuaraŭ u Rasiju, karystajučysia ščylinaj u sankcyjnym zakanadaŭstvie. Prapanovu kampanii žurnalisty znajšli na rasijskaj płatformie Dzen.ru u aŭtarskim kanale «Aŭtlet parka».
Žurnalisty pad vyhladam zacikaŭlenaha pakupnika z Rasii patelefanavali pa paznačanym u materyjale numary i parazmaŭlali ź Janaj Levanieŭskaj. Dyrektarka paskardziłasia, što z prodažami tavaraŭ katehoryi luks u Biełarusi składana, i «Trendchoł» płanuje admovicca ad hetaha siehmienta i rabić upor na «siaredni kłas».
Levanieŭskaja prapanavała vykupić luksavyja reštki i paabiacała, što prablem z prodažam padsankcyjnych tavaraŭ u Rasii nie budzie.
«U Jeŭropie ŭsie hetyja brendy, ź jakimi my ŭstalavali adnosiny, zacikaŭlenyja, kab my ŭ ich kuplali. I jany viedajuć, kudy idzie ich tavar i kudy jon moža pajści», — cytujuć žurnalisty słovy žančyny. Pa kamientary jany źviarnulisia niepasredna da brendaŭ, ale adkazu pakul nie atrymali.
Pakul, jak pišuć aŭtary, kampanija «Trendchoł» praciahvaje šukać aptovych pakupnikoŭ, a «Aŭtlet park» na svaim sajcie prapanuje pasłuhi dastaŭki brendavych tavaraŭ nie tolki pa terytoryi Biełarusi, ale i va ŭsie rehijony RF rasijskaj kurjerskaj słužbaj dastaŭki CDEC.
Kupić miljard za €230 miljonaŭ. Prodaž Pryjorbanka azałaciŭ biznesmienaŭ udačy pry Łukašenku
Abychodzić sankcyi «kašalku Łukašenki» Zajcavu dapamahaje staŭbcoŭski ksiondz Łašuk — BRC
Łukašenkaŭski «biznesmien udačy» Alaksandr Zajcaŭ staŭ rycaram papskaha ordena. U hetaj historyi jość niuansy
Biznesoviec Zajcaŭ zarehistravaŭ «Biełkosmas»
Ciapier čytajuć
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu12
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary