Biełarus adkryŭ u Varšavie studyju manikiura, dzie robiać pačvarnyja paznohci FOTY
Treš-manikiur — trend apošnich niekalkich hadoŭ. Jaho nazyvajuć ugly nails («pačvarnyja paznohci»). Biełarus Alaksiej Vaškievič paŭtara hoda tamu adkryŭ u Varšavie studyju, dzie jakraz robiać takija: stylizujuć paznohci nasiakomymi, skuraj źmiai, hrybami, ziamloj… Chłopiec raskazaŭ, jak rašyŭsia adkryć taki niezvyčajny sałon i ci šmat u jaho klijentaŭ.
Alaksiej. Fota: tut i dalej asabisty archiŭ
«Rabić prosta roŭnyja paznohci — heta sumna. Ja hladžu na heta jak na mastackuju spravu»
Alaksieju 27 hadoŭ, pa adukacyi — skulptar. Jon skončyŭ Akademiju mastactvaŭ va Urocłavie ŭ 2021 hodzie.
«Va ŭniviersitecie zacikaviŭsia vyvučeńniem hiendarnaj niaroŭnaści, stereatypaŭ: siniaje — dla chłopčykaŭ, ružovaje — dla dziaŭčynak. Pajšoŭ na kursy manikiuru, chutčej, dla ekśpierymientu — pakazać, što mužčyny heta taksama mohuć», — raskazvaje Alaksiej.
Rabić manikiur akazałasia nie tak prosta, jak jon sabie ŭjaŭlaŭ. Chłopiec zakinuŭ hetu spravu na niekalki hadoŭ.
Ale paśla ŭniviersiteta znoŭ staŭ piłavać paznohci. Spačatku prymaŭ klijentaŭ doma, a praz paŭhoda źniaŭ nievialiki pakoj dla pracy.
«Rabić prosta roŭnyja paznohci — heta sumna. Ja hladžu na heta ŭsio jak na mastackuju spravu. Kali jašče pačynaŭ rabić niezvyčajny manikiur, nie było nazvy ugly nails jak trenda, heta ŭžo paźniej źjaviłasia. U polskim hramadstvie jość vialiki zapyt na ugly nails. Mnohija zaraz chočuć piersanalizacyi, stamilisia ad bazavaj vopratki, vałasoŭ, paznohciaŭ. Ugly nails stali vyrazam siabie», — tłumačyć jon.
«Studyja akupiłasia za hod»
Praz hod pracy ŭ svaim kabiniecie Alaksiej zadumaŭsia pra studyju: kolkaść klijentaŭ rasła. Jon znajšoŭ inviestara, jaki daŭ hrošy na adkryćcio sałona.
«Suma akupiłasia za hod, — raskazvaje Alaksiej. — Paŭhoda pracavaŭ u studyi ja adzin, a paśla nabraŭ piersanał, bo ludziej stała jašče bolš. Ciapier majem 300 klijentaŭ na miesiac. Uziaŭ try dziaŭčyny — dźvie ŭkrainki i adna polka. Ciapier jak majstar ja pracuju mienš, biaru na dzień niedzie try-čatyry klijenty. Jašče ŭ nas jość nievialiki kabiniet, dzie chłopiec-biełarus robić tatuiroŭki».
Inviestar, jaki prafinansavaŭ studyju, mieŭ dośvied u viadzieńni biznesu, tamu chłopcu pašancavała. Jak i z pamiaškańniem, jakoje znajšłosia vypadkova — heta byłaja krama rukadziella. Arenda (70 kvadrataŭ) kaštuje 1500 jeŭra na miesiac. Bolšuju častku inviestycyj daviałosia ŭkłaści ŭ abstalavańnie i meblu.
Ci było składana znajści majstroŭ, jakija ŭmiejuć rabić ugly nails?
«Nie, trend užo aktyŭna raźvivajecca, — kaža chłopiec. — Jak niekatoryja klijenty stamilisia ad bazavych paznohciaŭ, tak i majstry».
Asnoŭnyja klijenty Ugly nails — maładyja ludzi ad 16 da 25 hadoŭ, ale časam prychodziać i starejšyja. Alaksiej kaža, što siarod studyj kankurentaŭ u ich niama.
Košt pačvarnych paznohciaŭ — ad 70 da 120 jeŭra
Paznohci ŭ studyi mohuć nabyvać samyja dziŭnyja formy. Majstry zataplajuć u łaku nasiakomych, ziamlu, liście, źmiainuju skuru, hryby. Pa časie taki manikiur zajmaje dźvie hadziny, košt dasiahaje 120 jeŭra.
«U płanie hihijeny tut usio ŭ paradku, tamu što paznohać pakryvajecca spačatku bazaj, i ŭžo biez roźnicy, što źvierchu. Časam klijenty sami prynosiać, što chočuć zatapić u paznohci, naprykład, aŭtobusny bilet».
Na starcie ŭ studyi rabili tolki «pačvarnyja» paznohci, zvyčajnaha manikiuru nie było. Ale potym Alaksiej vyrašyŭ źmianić stratehiju.
«Kali niechta prychodziŭ na zvyčajny manikiur, to ja kazaŭ, što heta kaštuje stolki ž, — raskazvaje jon. — Źjaviłasia ideja ŭvieści takuju praceduru, kab naroščvać klijenckuju bazu. Chtości pryjdzie adzin raz, pahladzić na ugly nails i ŭ nastupny raz zachoča zrabić».
Alaksiej maryć kali-niebudź stvaryć manikiur z burštynavym efiektam.
A pakul samyja niezvyčajnyja jaho dyzajny — zatopleny ŭ łaku kamar, manikiur z sapraŭdnymi hrybami, vałasami kata klijentki i źmiainaj skuraj.
Znajšli rasijskaha vajskoŭca, jaki maje dačynieńnie da zabojstva žančyny z čyrvonym manikiuram u Bučy. Jaje fota stała simvałam raźni
Jak tort, fota ŭ vańnie i śviatočny manikiur dapamahajuć raskryć zdradu? Siužety z žyćcia biełarusaŭ, jakim pazajzdrościła b Ahata Kryści
«Dźviery lažali ŭnutry kabinieta». U polskim Hdańsku dvojčy abakrali sałon pryhažości biełaruski
Ciapier čytajuć
Zališniaje budaŭnictva: ci moža luboŭ biełarusaŭ inviestavać hrošy ŭ kvatery pryvieści da kryzisu na rynku nieruchomaści?5
Kamientary
V kakuju katiehoriju ich zapišietie i kak k nim budietie otnosiťsia?