ISW: U Pucina zastałosia resursaŭ na 12-16 miesiacaŭ vajny

Jak ličyć Baras, prykładna praz hod mohuć być vyčarpanyja jak reziervy biudžetu dla finansavańnia bajavych dziejańniaŭ, tak i mahčymaści ŭładaŭ znachodzić «dobraachvotnikaŭ» dla frontu.

Ciapier rasijskija rehijony viarbujuć štodnia 1-1,5 tysiačy čałaviek, zavablivajučy na vajnu ščodrymi bonusami, siaredni pamier jakich dasiahaje 1,4 miljona rubloŭ (kala 14 700 dalaraŭ). Heta dazvalaje kampiensavać frantavyja straty, jakija NATA aceńvaje ŭ 30-45 tysiač čałaviek štomiesiac i bolš za 900 tysiač čałaviek z pačatku vajny.

Adnak padtrymlivać hety temp naboru ŭ vojska ŭłady biaskonca nie zmohuć, upeŭnieny Baras: im daviadziecca praciahvać pavyšać bonusy, kab «palavać za demahrafičnaj bazaj» jašče nie adpraŭlenych na front mužčyn, i ŭ kančatkovym vyniku hetaja palityka ŭprecca ŭ prablemy biudžetu.

Ciapier tolki vypłata «bonusaŭ» za padpisańnie kantraktu abychodzicca rasijskamu biudžetu ŭ 2 miljardy rasijskich rubloŭ (kala 23,7 miljona dalaraŭ) u dzień, abo 730 miljardaŭ rubloŭ (kala 8,6 miljarda dalaraŭ) u hod. Heta amal udvaja bolš za hadavyja biudžety bahatych i bujnych rehijonaŭ, takich jak Śviardłoŭskaja vobłaść abo Krasnajarski kraj.

Kreml raźličvaje na toje, što administracyja Donalda Trampa prypynić abo skarocić dapamohu Ukrainie — heta źmienšyć straty rasijskaha vojska i dazvolić Pucinu praciahvać vajnu daŭžej, miarkuje Baras.

«Kanflikt budzie vyrašany vajennym šlacham, — upeŭnieny jon. — Usio zaležyć tolki ad taho, budzie heta pieramoha Rasii ŭ toj ci inšaj formie ci pieramoha Ukrainy ŭ toj ci inšaj formie».

Za 2022-2024 hady ŭrad Rasii vydatkavaŭ na vajnu 22,3 tryljona rubloŭ (kala 234,7 miljarda dalaraŭ), a kab zakryć biudžetnyja «dzirki», vydatkavaŭ dźvie traciny svabodnych srodkaŭ Fondu nacyjanalnaha dabrabytu (FND): jaho likvidnyja aktyvy za try hady skaracilisia na $106 młrd i apuścilisia da minimumu za apošnija 17 hadoŭ. U biudžet-2025 Kreml zakłaŭ jašče 13,2 tryljona rubloŭ (kala 139 miljardaŭ dalaraŭ) vajennych vydatkaŭ i vymušany znoŭ vydatkoŭvać FND, kab kampiensavać pravał naftahazavych pastupleńniaŭ praz rezkaje padzieńnie cenaŭ nafty.

U krasaviku barel hatunku Urals upieršyniu amal za dva hady pradavali tańniej za $50 za barel. A pry takich cenach FND chopić prykładna na hod, aceńvaje Volha Bieleńkaja, ekanamistka «Finama».

Z naftaj nižej za $50 biudžet niedaatrymaje 1,9 tryljona rubloŭ (kala 20 miljardaŭ dalaraŭ) syravinnaj renty, a kali Urals patańnieje da $45 — amal 3 tryljony rubloŭ (kala 31,6 miljarda dalaraŭ), padličyli analityki Rajfajzenbanka.

• 6
• 0
• 0
• 0
• 0
• 0
• 0
• 0