Тунэльны сіндром запясця — гэта хвароба, якая можа моцна сапсаваць жыццё. Яе сімптомы ўключаюць у сябе боль і здранцвенне ў руцэ, а сярод частых ахвяр — людзі, якія шмат працуюць за камп’ютарам. Што рабіць, калі такі сіндром з’явіўся ў вас?
Ёсць шэраг мускулаў, дзякуючы якім мы можам рухаць вялікімі пальцамі, і частку з гэтым мускулаў кантралюе так званы сярэдзінны нерв. Тунэльны сіндром узнікае, калі гэты нерв сціскаецца на месцы пераходу ў запясце. Звычайна гэта вынік таго, што сухажыллі ў запясці апухаюць і ціснуць на нерв, піша The Times.
Сярод сімптомаў хваробы рука коле, пабольвае і нямее. Частыя прычыны сіндрому — рэгулярная праца за камп'ютарам, звычка шмат пісаць рукой ці іншая актыўнасць, звязаная з аднастайнымі рухамі запясцем. Але ж да тунэльнага сіндрому могуць прывесці іншыя, больш сур'ёзныя хваробы: атлусценне, дыябет, рэўматоідны артрыт прамянёва-запясцевага сустава і хваробы шчытападобнай залозы.
Людзям з праявамі сіндрому рэкамендуюць штодзень рабіць практыкаванні: напрыклад, згінаць запясце наперад і назад ці расцягваць запясце. Робіцца гэта так: пакладзіце левую руку ўнутраным бокам на стол, але старайцеся адарваць пальцы ад стала. Прыцісніце правую далонь унутраным бокам да пальцаў левай рукі і спрабуйце падняць яе пальцы. Могуць дапамагчы і практыкаванні да кожнага асобнага пальца — проста асцярожна згінайце іх навонкі на працягу некалькіх секунд. І не забывайце рабіць кожнае практыкаванне як на правую, так і на левую руку.
Шмат у каго праявы тунэльнага сіндрому горшаюць ноччу ці раніцай, а здранцвенне і слабасць у вялікім пальцы ўвогуле могуць стаць пастаяннай з’явай. Каб палепшыць свой стан, людзі часта высоўваюць руку з ложка, каб яна вісела, ці трасуць рукой, але медыкі раяць як мага хутчэй звярнуцца па дапамогу спецыяліста. Калі не лячыць тунэльны сіндром, пашкоджанне нерва можа набыць сталы характар, і тады пазбавіцца ад сімптомаў ужо не ўдасца.
Калі пацыент адчувае моцны боль і практыкаванні не дапамагаюць, доктар можа прапісаць больш сур'ёзныя сродкі. Часам пацыентам раяць спецыяльныя шыны, якія падтрымліваюць запясце і не даюць ім занадта шмат рухаць. Калі і гэта не дапамагае, у запясце колюць стэроіды, што палягчае боль. Яшчэ адзін варыянт — аперацыя, якая дапамагае знізіць ціск на сярэдзінны нерв.
Кавід вяртаецца. Усяму віной новыя штамы, і вось іх сімптомы
Пакутуеце ад спёкі? Глядзіце, як ёй даюць рады арабы
Нашто парыць ногі ў воцаце? Просты сродак ад праблем, пра якія не прынята гаварыць
Цяпер чытаюць
У пачатку вайны кавэзэшніцу Марыну Грыцук вывозілі з-пад Кіева на танку. Цяпер яна вядзе мерапрыемствы ў Расіі6
Каментары