У Беларусі выставілі на продаж Mercedes-Benz W124 за 54 000 даляраў. За што просяць такія грошы
Паглядзелі, чаму за 31-гадовага «Мэрса» просяць так шмат.
«Цана пазначаная дакладна»
У Мінску за 54 тысячы даляраў прадаюць Mercedes-Benz E500 у кузаве W124. Высокая цана на аўтамабіль 1992 года выпуску абгрунтоўваецца тым, што гэта не нейкі шараговы 124-ты, а арыгінальны Е500.
Пад капотам у яго 5-літровы V8 магутнасцю 322 к.с. Заяўлены прабег аўтамабіля — 248 тысяч кіламетраў.
Прынамсі візуальна аўтамабіль знаходзіцца ў добрым стане.
Скураны салон, сядзенні з электрапрывадам і памяццю, ёсць клімат-кантроль, круіз-кантроль і нават мабільны тэлефон з фірмовым лагатыпам Mercedes-Benz.
У аб'яве пазначана, што аўтамабіль у Беларусь прыехаў з Германіі ў 2002 годзе і ўвесь гэты час знаходзіўся ва ўласнасці аднаго чалавека.
«Стан ідэальны. Цана пазначаная дакладна. Хто не ведае, што гэта за аўтамабіль, прагортваць», — дадае прадавец.
Чым унікальны гэты аўтамабіль?
Е500 у 124-м кузаве выпускалі з 1990 па 1994 год. Ад звычайных W124 ён адрозніваецца не толькі тэхнічна, але і знешне. Гэтую мадэль можна адрозніць па пашыраных колавых арках, іншых бамперах і бакавых накладках, якія ў народзе завуць «ліствой».
Мадэль Е500 была распрацаваная інжынерамі Mercedes-Benz пры ўдзеле інжынераў Porsche. У 1993 годзе новы такі аўтамабіль каштаваў 145 тысяч дойчмарак у Нямеччыне і 81 800 даляраў у ЗША.
Усяго было выпушчана 10 479 Mercedes-Benz E500 у кузаве W124.
Ці сапраўды ён настолькі каштоўны?
У Беларусі іншых Е500 у продажы няма, а наступныя па дарагоўлі W124 прадаюцца за 11 000 і 10 500 даляраў ЗША.
На нямецкім сайце па продажы аўто mobile.de цэны на Mercedes-Benz E500 пачынаюцца з 30 тысяч еўра.
Адзіны Е500, выстаўлены на продаж на расійскім сайце auto.ru, ацэнены ў 3,9 млн расійскіх рублёў — гэта каля 43 тысяч даляраў.
Чытайце таксама:
На продаж амаль за 20 тысяч даляраў выставілі 15-гадовы VW Passat B6. У чым яго фішка
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»23
Каментары