Вінаваты, хутчэй за ўсё, пілот ваеннага верталёта.
Выданне The New York Times спасылаючыся на інфармацыю, атрыманую ад чатырох асоб, знаёмых з сітуацыяй, піша, што ваенны верталёт Army Black Hawk, які ў сераду ўвечары сутыкнуўся з рэгіянальным рэйсам American Airlines у аэрапорце імя Рональда Рэйгана, магчыма, знаходзіўся па-за ўзгодненым маршрутам і ляцеў вышэй за дазволены ўзровень.
Паводле іх, верталёт Army Black Hawk павінен быў знаходзіцца ў іншым месцы і ляцець значна ніжэй, перасякаючы ажыўленую паветраную прастору аэрапорта імя Рэйгана.
Перад тым як увайсці ў загружаную зону камерцыйных рэйсаў, верталёт мусіў атрымаць дазвол авіядыспетчара. У дадзеным выпадку пілот запытаў дазвол на выкарыстанне спецыяльнага загадзя вызначанага маршруту, які прадугледжваў максімальную вышыню палёту 60 метраў і праходзіў уздоўж усходняга берага ракі Патамак. Гэта дазволіла б верталёту пазбегнуць сутыкнення з самалётам American Airlines.
Гэты маршрут, вядомы як «Маршрут 4» у аэрапорце імя Рэйгана, дакладна пазначаны і добра знаёмы як дыспетчару, так і пілоту верталёта. Пілот пацвердзіў, што бачыць самалёт, і дыспетчар загадаў яму трымацца вызначанага курсу і прайсці ззаду лайнера.
Аднак, паводле крыніц, пілот верталёта не вытрымаў маршрут. Замест таго каб ляцець ніжэй за 60 метраў, ён узняўся вышэй за 90 метраў і знаходзіўся як мінімум за 800 метраў ад узгодненага шляху, калі здарылася сутыкненне.
Як піша NYT, высокапастаўлены армейскі чыноўнік заклікаў устрымацца ад высноў, пакуль не будуць прааналізаваныя даныя з чорнай скрыні верталёта і іншыя доказы.
Па яго словах, пілоты Black Hawk ужо ляталі гэтым маршрутам і добра ведалі абмежаванні па вышыні і строгія правілы палёту ў паветранай прасторы каля аэрапорта.
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну86
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары