Беларусаў папярэдзілі пра новую махлярскую схему, якую могуць выкарыстоўваць каля банкаматаў. Ашуканцы разлічваюць на тое, што чалавек заўважыць чужую банкаўскую картку, пакінутую ў картрыдары, і возьме яе ў рукі.
Схема выглядае так: зламыснікі наўмысна пакідаюць картку ў банкамаце або побач з ім. Яны чакаюць, пакуль выпадковы чалавек возьме яе ў рукі, каб вярнуць уладальніку. Пасля гэтага каля яго раптам з'яўляецца чалавек, які называецца ўладальнікам карткі, а разам з ім — некалькі падстаўных «сведкаў».
Чалавека пачынаюць абвінавачваць у крадзяжы грошай з рахунку. Яму могуць заявіць, што на картцы нібыта была вялікая сума, якая знікла, а на самой картцы засталіся яго адбіткі пальцаў. Такім чынам ашуканцы спрабуюць выклікаць страх і паніку.
Пасля гэтага яны прапануюць «вырашыць пытанне на месцы», не звяртаючыся ў міліцыю. Разлік робіцца на тым, што спалоханы чалавек захоча як мага хутчэй пазбегнуць канфлікту і можа аддаць ашуканцам свае грошы.
Спецыялісты раяць у такой сітуацыі не браць чужую картку ў рукі. Калі яна засталася ў банкамаце, лепш проста адысці — праз пэўны час банкаўскі апарат звычайна сам забірае картку ў спецыяльнае аддзяленне.
Таксама можна паведаміць пра знаходку ў банк, патэлефанаваўшы па нумары службы падтрымкі, які пазначаны на банкамаце, або звярнуцца ў міліцыю па нумары 102.
Калі пасля гэтага да вас падыходзяць невядомыя людзі і пачынаюць нешта патрабаваць, не трэба ўступаць з імі ў спрэчкі, перадаваць ім грошы або абмяркоўваць сітуацыю.
Цяпер чытаюць
У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара2
Каментары
Здаецца, ужо было гэта нейдзе.