Назвалі 20 найлепшых авіякампаній свету. Еўрапейскіх з іх толькі шэсць

Еўрапейскія авіякампаніі ў гэтым годзе прыкметна апусціліся ў табелі аб рангах прэміі World Airline Awards: першую дзясятку амаль цалкам занялі перавозчыкі з Азіі і краін Блізкага Усходу.

Singapore Airlines атрымала галоўны тытул, другое месца заняла Qatar Airways, трэцяе — Cathay Pacific, а найлепшай з еўрапейскіх кампаній стала Turkish Airlines, якая размясцілася на пятым радку.

У першую дваццатку ўвайшлі ўсяго шэсць еўрапейскіх авіякампаній: да Turkish Airlines далучыліся Air France, Lufthansa, Iberia, Virgin Atlantic і Swiss International Air Lines.

Пераможцы прэміі World Airline Awards 2026 былі абвешчаныя на ўрачыстай цырымоніі ў Лондане, арганізаванай рэйтынгавым агенцтвам у сферы авіяперавозак Skytrax.

Прэмію, якую называюць «Оскарам авіяцыйнай галіны», уручаюць з 1999 года і, як адзначыў генеральны дырэктар Skytrax Эдвард Плейстэд, яна «падкрэслівае ўзровень якасці прадукту і сэрвісу, які авіякампаніі забяспечваюць сваім пасажырам».

У рэйтынгу ацэньваліся больш за 300 авіяперавозчыкаў, і хоць еўрапейскія аператары не здолелі абысці канкурэнтаў у галоўнай намінацыі, у іншых катэгорыях яны паказалі цалкам годныя вынікі.

Air France асабліва вызначылася, атрымаўшы ўзнагароды за найлепшы ў свеце першы клас, найлепшае харчаванне ў лаўндж-зале для пасажыраў першага класа і найлепшыя ў свеце наборы для камфортнага палёту ў першым класе, а таксама была прызнаная найлепшай авіякампаніяй Заходняй Еўропы.

Іспанская Vueling атрымала прэмію як найлепшы бюджэтны авіяперавозчык Еўропы; у гэтай катэгорыі таксама былі адзначаныя нямецкая Eurowings, іспанскія Iberia Express і Volotea, а таксама нідэрландская Transavia.

Тым часам Turkish Airlines заваявала тры ўзнагароды: за найлепшую авіякампанію Еўропы, за найлепшае ў свеце харчаванне ў бізнэс-класе і за найлепшую авіякампанію Паўднёвай Европы.

«Адзінаццаты раз быць прызнанымі найлепшай авіякампаніяй Еўропы і заняць першае месца яшчэ ў дзвюх катэгорыях — вялікі гонар для нас, сям'і Turkish Airlines», — заявіў старшыня рады дырэктараў Turkish Airlines Мурат Шэкер.

У іншых намінацыях Iberia атрымала ўзнагароду за найлепшы сэрвіс наземнага персаналу сярод еўрапейскіх авіякампаній, а LOT Polish Airlines была ўганараваная звання найлепшай авіякампаніі Цэнтральнай Еўропы.

Ніводная еўрапейская кампанія не ўвайшла ў лік лідараў катэгорыі «найлепшы экіпаж салона», дзе галоўны прыз атрымала Cathay Pacific Airways, а ў дзясятку найлепшых рэгіянальных авіякампаній свету трапіла толькі грэцкая Aegean Airlines, заняўшы чацвёртае месца.

Qatar Airways страчвае лідарства

У агульным заліку Qatar Airways, дзевяціразовы ўладальнік тытула найлепшай авіякампаніі свету, апусцілася на другі радок, саступіўшы Singapore Airlines.

Тым не менш перавозчык, які базуецца ў Досе, здолеў заваяваць чатыры галоўныя ўзнагароды, уключаючы званне найлепшай у свеце авіякампаніі для пералётаў у бізнэс-класе — трынаццаты раз — і найлепшай авіякампаніі Блізкага Усходу.

Кампанія таксама стала першым лаўрэатам новай прэміі за найлепшы бартавы Wi‑Fi у свеце. Гэтую намінацыю ўвялі ў гэтым годзе, каб падкрэсліць важнасць хуткага і бясплатнага доступу да інтэрнэту на борце для многіх сучасных падарожнікаў.

20 найлепшых авіякампаній свету ў 2026 годзе

1. Singapore Airlines;
2. Qatar Airways;
3. Cathay Pacific;
4. ANA All Nippon Airways;
5. Turkish Airlines;
6. Emirates;
7. Air France;
8. Hainan Airlines;
9. Japan Airlines;
10. Korean Air;
11. EVA Air;
12. Qantas Airways;
13. STARLUX Airlines;
14. Lufthansa;
15. Saudi Arabian Airlines;
16. Iberia;
17. Air Canada;
18. Virgin Atlantic;
19. Swiss International Air Lines;
20. Thai Airways.

• 2
• 0
• 0
• 0
• 0
• 0
• 0
• 0