Tolki za mahčymaść pravieści płaciež davodzicca pierapłočvać 4—6%. Biznes patłumačyŭ, čamu rastuć ceny
Z 6 kastryčnika Łukašenka zabaraniŭ padymać ceny. Paźniej Hienprakuratura daručyła zatrymlivać padazravanych u roście cen, a KDK uvioŭ śpiecyjalny numar dla pryniaćcia danosaŭ. Užo viadoma pra 10 kryminalnych spraŭ. Padčas papulisckaha raznosu ad Łukašenki vyhladała, nibyta va ŭsim vinavatyja pasiaredniki, handlovyja sietki dy čynoŭniki. Pradstaŭniki biznesu miarkujuć inakš.
Minimalnaja kamisija dla hrašovych pieravodaŭ — 150 jeŭra
Na dumku impiorcieraŭ tavaraŭ ź ES, adzin z hałoŭnych čyńnikaŭ, jaki ŭpłyvaje na rost cen, — sankcyi. Jany pastupova ŭzmacniajucca, tamu ŭ biznesu źjaŭlajecca ŭsio bolš pieraškod, abychod jakich patrabuje dadatkovych vydatkaŭ.
«Pačatkova na rost sabiekoštu tavaraŭ, što impartujucca ź Jeŭropy, mocna paŭpłyvała zabarona na pracu biełaruskich transpartnych kampanij na terytoryi ES. Dastaŭka hruzaŭ padaražeła ŭ 2-4 razy. Naturalna, što kali za dastaŭku fury tavara davodzicca płacić na 2-3 tysiačy jeŭra bolš, to heta zaŭvažna adabjecca na kančatkovaj canie», — adznačaje biznesoviec.
Druhi značny čyńnik, jaki ŭpłavaje na košt tavaru — sankcyi ŭ bankaŭskaj śfiery. Bo składanaści ź pieravodami isnujuć, navat niahledziačy na toje, što biełaruskija banki nie adklučanyja ad SWIFT.
«Časam davodzicca sutykacca z vypadkami, što firma, jakaja znachodzicca ŭ ES, hatovaja i nadalej pracavać ź Biełaruśsiu, ale bank, u jakim jana absłuhoŭvajecca, admaŭlajecca prymać płaciažy. Naturalna, što dziela biełaruskich klijentaŭ nichto nie budzie źmianiać bank, tamu davodzicca šukać dadatkovyja šlachi, jak raźličycca za tavar».
Na dapamohu biznesu, jaki maje prablemy z raźlikami, prychodziać pasiaredniki, jakija hatovyja vyrašyć hetyja prablemy — zrazumieła, nie biaspłatna. Za svaje pasłuhi takija firmy biaruć 5-6% ad sumy ŭ invojsie. Minimalnaja kamisija składaje 150 jeŭra.
Vymušanyja pracavać praź firmy-prakładki
Taksama biznesoŭcy źviartajuć uvahu na toje, što častka jeŭrapiejskaha biznesu nie choča naŭprost pracavać z klijentami ź Biełarusi, tamu im davodzicca pracavać praź firmy-prakładki.
«Takija firmy majuć rachunki ŭ tych bankach, jakija biez prablem prymajuć płaciažy ź Biełarusi, ale jany taksama nie dabračynnyja arhanizacyi. Za svaje pasłuhi ŭ zaležnaści ad sumy ździełki jany zvyčajna biaruć ad 3 da 8%.
Aproč hetaha, biełaruskija banki, jakija praciahvajuć pravodzić płaciažy za miažu, u kancy leta taksama padniali staŭki za svaje pasłuhi. Heta ŭsio vydatki, jakija ŭźnikli ŭ vyniku taho, što praz udzieł u vajnie na našu krainu byli nakładzienyja sankcyi: naturalna, što ni biznes, ni pasiaredniki, jakich vinavacić Łukašenka, u hetym nie vinavatyja», — adznačaje surazmoŭca.
Za paŭhoda sabiekošt vyras bolš, čym na tracinu
Inšy biznesmien, jaki zajmajecca impartam tavaraŭ ź ES, padličyŭ, što tolki ŭ vyniku šalonaha rostu stavak na dastaŭku hruzaŭ u Biełaruś i vymušanuju pracu praź firmy-prakładki sabiekošt jaho tavaraŭ uzros pryblizna na 20-25 adsotkaŭ.
«Kali my siudy dadamo 10-15% rostu cany ŭ samoj Jeŭropie, to atrymajem, što toj samy pradukt za apošnija paŭhoda padaražeŭ bolš, čym na tracinu».
Čytajcie taksama:
Za pavyšeńnie cen užo zaviedzienaja pieršaja kryminalnaja sprava
U Baranavičach zatrymali namieśnika dyrektara kramy za pavyšeńnie cany na 13%
Sankcyi zastalisia, a dastaŭka ŭ Biełaruś padaražeje. Što źmianiłasia ŭ dačynieńni da jeŭrapiejskich pieravozčykaŭ?
Ciapier čytajuć
Zališniaje budaŭnictva: ci moža luboŭ biełarusaŭ inviestavać hrošy ŭ kvatery pryvieści da kryzisu na rynku nieruchomaści?5
Kamientary