«My budziem ščaślivyja, kali jon nie pryjedzie». U PAR znoŭ paprasili Pucina nie lacieć na samit BRIKS
Prezident PAR Sirył Ramafosa paprasiŭ Kreml nakiravać na mierapryjemstva zamiest Pucina kiraŭnika MZS RF Siarhieja Łaŭrova, raskazaŭ u intervju Mail & Guardian u piatnicu vice-prezident respubliki Poł Mašacile, jak piša The Moscow Times.
Pavodle paŭdniovaafrykanskaha palityka, rasijski bok adchiliŭ hetuju ideju, i ciapier praciahvajucca pieramovy ab farmacie ŭdziełu Pucina, u dačynieńni da jakoha Mižnarodny kryminalny sud u Haazie vydaŭ ordar na aryšt.
Jak kraina — člen Mižnarodnaha kryminalnaha suda, PAR abaviazanaja aryštavać Pucina ŭ vypadku jaho pajezdki na samit, jaki moža stać pieršym bujnym mižnarodnym mierapryjemstvam rasijskaha prezidenta z pačatku vajny.
«My razumiejem, što źviazanyja Rymskim statutam, — skazaŭ Mašacile. — Ale my nie možam zaprašać kahości, a paśla jaho aryštoŭvać. Vy možacie zrazumieć našu dylemu. My budziem ščaślivyja, kali jon nie pryjedzie».
Sprabujučy vyjści sa stanovišča, ułady PAR prapanavali pieranieści samit u Kitaj, ale sustreli admovu z boku Indyi i Brazilii. Ideja pravieści mierapryjemstva ŭ virtualnym farmacie nie zadavoliła ŭžo čatyroch členaŭ BRIKS.
Hetaja dalikatnaja mižnarodnaja situacyja ŭźnikła ŭ vyniku taho, što 17 sakavika 2023 hoda Mižnarodny kryminalny sud u Haazie vydaŭ mižnarodnyja ordary na aryšt prezidenta Rasii Uładzimira Pucina i ŭpaŭnavažanaj pa pravach dziciaci Maryi Lvovaj-Białovaj. Jany, jak śćviardžajecca, niasuć adkaznaść za vajennaje złačynstva — niezakonnuju departacyju dziaciej i ich niezakonnaje pieramiaščeńnie z akupavanych terytoryj Ukrainy na terytoryju Rasijskaj Fiederacyi.
U kancy krasavika prezident PAR zrabiŭ rezanansnuju zajavu ab tym, što kraina płanuje vyjści z-pad jurysdykcyi Mižnarodnaha kryminalnaha suda z-za situacyi z Pucinym. Adnak paźniej u ofisie kiraŭnika afrykanskaj dziaržavy abvierhli hetyja słovy jak skazanyja nibyta pamyłkova.
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary